董家間東方海外，今年3月份贊助咗16位科技大學嘅科技及管理雙學位課程學生，到佢哋喺上海外高橋保稅區嘅物流中心實地考察4日。咪以只係考察好輕鬆，呢班大學生返到香港要寫計劃書，向東方海外提出建議，點樣能夠以國際物流服務為基礎，利用新科技如RFID（無線標籤）同環球定位技術，發掘新商機；認真唔簡單。
東方海外喺咁多份企業計劃中，選咗一份最優秀嘅出嚟，個建議係，東方海外應發揮喺貨櫃運輸同物流網絡優勢，開拓新業務，建立一間洋酒經銷公司，因為內地對洋酒需求增長好大。同學仲大膽預期，呢項新業務可以為東方海外未來3年帶嚟6倍毛利增長。東方海外主席董建成聽完都「哇」一聲，唔知係驚歎洋酒業務前景秀麗，定係驚歎後生可畏。