大把新盤排住隊交樓，除咗好多人都關心，究竟有幾多買家撻定嘅問題之外，對於用家嚟講，收樓驗樓可能更重要。美聯大學堂下個禮拜六，即係29號，會免費搞一堂講座，題目係「置業新居、驗樓話咁易」，請嚟香港測量師學會建築測量師李海達做主講嘉賓。
內容係講解一手同二手樓嘅驗收程序，同埋一堆最常見嘅問題，掌握驗樓竅門，裝修時兼顧埋維修問題，總之就係知多啲驗樓就醒目啲啦。不過，如果驗樓竅門咁易就能夠掌握，班專門驗樓嘅測量師咪聽食穀種？
話時話，𠵱家香港地好多公司，都要顧及企業形象，好似美聯咁搞吓免費講座，已經係最基本建立品牌嘅方法。至於另一邊廂嘅香港置業，就積極用熱心公益事務，去優化公司形象，好似佢哋贊助一個「2006我最敬愛的老師」兒童徵文繪畫比賽，早兩日董事楊彩鳳就出席頒獎禮，頒完獎仲要同場畫吓畫。