澤楷二少成功搣甩8號仔，大家都估佢個勁有layer嘅管理團隊會逐個起身，無論係個board或者係啲高層。咁邊個係排喺二少之後，第二個唔玩？答案係冇千幾萬安家費而要自行創業嘅公關頭頭、幾個月前由靚太榮升靚婆婆嘅Jenny馮載祥太太。
靚婆婆噚日lastday，佢上星期抽空帶咗幾個行家去佢金鐘匯個好有律師樓feel嘅新竇參觀，公司寶號係「興禮」，係佢囝囝個名，而囝囝亦係公司董事之一。極有記者緣嘅靚婆婆話，歡迎各位老友記得閒上去坐吓，借地方寫稿都無任歡迎……查實佢喺官場同傳媒都咁多人脈，可以想像將來除咗記者、傳媒老總之外，仲會有好多官同官太出入。
講開又講，二少單世紀deal其實仲有手尾跟，好似立法會資訊科技及廣播事務委員會就擇緊日「討論」呢單野，冇咗馮太，相信二少都會有啲頭痕，唔知會唔會好快就有機會喺皇后大道東一睹二少風采呢？