前任保安局局長葉劉淑儀重入江湖，第一炮係組咗個智庫，中文名叫「匯賢」，英文就叫「SavantasPolicyInstitute」，呢個庫有幾猛料，今日就知。單睇個名，有「匯聚賢才」之意，不過八方覺得，同其他智庫例如「思匯」、「新力量」同「智經」比較，「匯賢」呢個名就唔夠潮，畀人感覺「老老哋」，好似明朝清朝啲牌匾咁。
退休公僕不應論政？
香港係國際都會，中文名舊啲唔緊要，英文名夠照可以搭夠。「匯賢」個英文名「Savantas」其實係法文，英文嘅「Savant」，解做「學者」或「有識之士」。有一個好流行嘅網上百科全書就話「Savant」多數用喺精於文學或科學嘅叻人，冇話喺政治方面。
不過，話葉劉搵埋咁多精英，唔搞政治，你估想鑽研咩學問咩？無論點，葉劉企出嚟，對陳太同港台都有好處。先講陳太，所謂無敵係最寂寞，有葉劉呢個對手，場仗都好睇好多；葉劉更加令到早一排猛咁話退休公務員唔應該論政，甚至話人操守有問題嘅人，唔知點自圓其說；諗起都幾好笑。
再講港台，八方聽港台中人講，佢哋家吓最想請嘅嘉賓就係葉劉（點知俾亞視捷足先登，你話輸埋俾商台就大鑊），只要佢肯制，用八人大轎抬佢阿姐上廣播道，畀夠八日佢blog都得；事關上次佢哋畀陳太blog咗四日之後，大家都諗定明年3月26號去申請失業救濟金，𠵱家有咗葉劉，只要得佢垂青，幫手洗洗底，咁港台就有救喇！
講起亞視，葉劉噚日去咗亞記錄影，開埋咪論政，想做咩唔使講都估到啩。雖然闊別兩、三年，但佢呢鋪重返香江，作風同以前一樣咁硬咁寸，有記者喺錄影廠問佢，想問啲嘉賓咩問題，佢竟然話「我都未諗掂喎」，之後又話「𠵱家係影相，唔係做訪問」！
作風依舊之外，葉劉都有啲嘢變咗，呢位成日珠光寶氣嘅阿太