煲呔去星洲，同記者茶敍，食食吓嘢忽然問啲記者屬於邊間報館。問勻全部人之後，佢發現《信報》冇派人嚟，好關心咁問大家：「《信報》喺邊度呀？」跟住有啲消息靈通嘅行家，就同煲呔講吓《信報》情況。
其實除咗《信報》外，都仲有《成報》、《南華早報》、《新報》同啲免費報冇嚟，但煲呔淨係問《信報》，梗係同被傳賣盤畀小小超有關啦！連煲呔都咁關注，可見呢份報紙的確有地位，小小超如果真係買得成，千祈唔好搞電盈翻版，將間報館拆晒骨，然後再由北京資本接收！
相比之下，煲呔就真係唔多關心佢嘅舊同事葉劉喇，啲行家順便搭單問吓葉太壇匯賢基金，煲呔即刻扮聽唔到，仲反問記者：「咩嘢太呀？」