西環舊樓值租，因為樓價夠平，長期有班投資客買樓收租，個別好彩嘅，執到平貨，摸一轉都有錢賺，好似堅尼地城西環新樓嘅就係一例，4個月升值三成七，袋近37萬銀，真可謂淡市奇葩。
世紀21堅城楊海燕話，西環新樓高層8號室，580呎，剛啱以136.8萬元，賣咗畀個用家，原業主3月份買入價只係100萬元，賺到笑；佢可以執到平貨，皆因買入時單位極度殘破，幾乎可以用垃圾崗去形容。原業主花咗十幾廿萬銀徹底大翻新，仲間成3房戶，結果新買家一見鍾情，畀多30幾萬人使去承接。
西環新樓屬單幢樓，每層10伙，65年落成，成41年樓，呎價可以去到2300幾，都咪話唔理想。物業隔籬就係泓都第3座，啱啱賣出嘅一伙，望到開揚單邊公園景，內外都靚，唔怪得之引到買家「落叠」。
楊海燕話，其實西環一帶好多舊樓都有短炒客搵食，一般摸貨賺價水位約5至10個巴仙，呢類客大概佔每月成交量5%左右，另外就有成半至兩成客係長線投資者，買樓收租好過放銀行；其餘就係用家接貨。畢竟西環鄰近中環，將來又有地鐵，百幾萬買到五、六百呎單位，港島區選擇真係唔多。
電郵地址：[email protected]
