禮拜日由彭美拉斯鬥哥連泰斯嘅巴甲聯榜尾戰，結果衰到貼地嘅哥連泰斯輸0:1，仲要係6連敗兼無入球。之前就話隊波有11件主將缺陣，有藉口；但禮拜日場波陣容完整番唔少，到底呢隊去屆冠軍搞邊科？上季贏到笑嘅捧場客，怕且唔敢再追啩？
呢場波哥連泰斯已經有馬斯真蘭奴、列卡甸奴、卡路士阿爾拔圖、尼爾馬同埋尼利等主將壓陣；但成班波依然踢得沉，抵輸。我求大俠相信無咩人解釋到哥連泰斯呢間富豪球會點解突然盛極而衰，唔通係上季爭議聲中贏冠軍嘅報應？定還是隊波一早犯眾憎，連球員都踢到無mood？抑或係爭霸後已完成目標，球員欠動力？
彭軍贏波但傷2門將
哥連泰斯嘅對手彭美拉斯表面上非常好景，贏完華斯高再砌贏哥連泰斯，2連勝後上番尾3位置；不過，呢場贏波代價唔少，正選龍門馬高斯開波無耐傷出後，後備嘅沙治奧路爾斯後來又傷埋，家吓剩番第3龍門廸亞高卡華利尼，都咪話無隱憂。禮拜六佢哋作客戈亞斯，可能係獲利回吐之時。
整個巴甲聯大勢，最近戰果都未太反常，但啱啱嗰期6寶半全場又冇人中正獎，累積35萬多寶；我求大俠覺得固然難中，另一原因係巴甲聯根本吸引力唔夠，投注額唔多。
「怕且哥連泰斯仲有排頹，不過波迷最關心都係巴甲聯大勢。我求大俠認為巴甲聯不嬲都唔易估，至少上季張三李四都長買哥連泰斯W，除笨有精，今季就少咗隊目標球隊，難上加難。」