成日都話香港班商家淨係顧住搵銀，冇諗過自己嘅企業社會責任，澳洲會計師公會做咗個調查，發現只有27%受訪者，同意上市公司及政府有履行企業社會責任，比起馬來西亞同新加坡低好多。只得27%，香港喺呢方面真係幾弱，如果再唔反省，睇嚟香港嘅競爭力真係凍過水。
會長黎嘉恩話，企業社會責任範圍好廣，包括環保、慈善、企業管治、營商手法同員工嘅內部培訓，佢提議政府做多啲呢方面嘅教育工作，同埋喺可持續發展委員會度搞個小組大力推廣。
佢仲話，自由放任政策或多或少影響本地對企業社會責任嘅認知，中小企通常都係着重短線回報，相反，履行社會責任就係長線投資，最多都係捐吓錢，所以佢建議資源有限嘅中小企老闆同員工建立友好關係，了解佢哋嘅需要同埋困難，或者聘請殘疾人士，一來可以提高士氣；二來對品牌起正面作用，令公司長期受益。