肥龍噚日上晝出巡，今次去咗屯門，算係認真畀面有新界王之稱嘅屯門區議會主席劉皇發。煲呔要建造親民形象，三司十一局當然要緊跟啦，何況係佢嘅左右手肥龍。
佢老哥首先去咗屯門圍視察河道改善工程，然後就聽屯門民政事務專員鍾少騰向佢介紹滅蚊同埋保持環境衞生嘅工作。
肥龍好彩，因為前日落咗場大雨，冇咁熱，佢就除晒領呔去視察，實行響應老細輕裝上班嘅呼籲。
去到仁愛堂彩虹社區中心參觀，佢仲大開眼界，睇吓啲民間智慧點樣變法建屯門，包括將啲舊衣物變成有用嘅布製物品，以及將食物廢油變成肥皂等。
肥龍梗係高度讚賞屯門人互惠互利啦，佢後嚟仲去聽啲區議員講區內交通問題，咁深港通道同后海灣幹線快通車，梗係要做好準備。