今日，孫柏文一定要重申下半年出現股市大幅下滑嘅可能性。我曾經講過，大趨勢一定要看基本因素，而最好配合技術分析去搵出入市時機。
基本分析上，花旗國、日本、歐洲、甚至我哋祖國，都已經紛紛開始從經濟體系裏面抽水走。特別係花旗國同日本嘅中央銀行，佢哋就好似兩個酗酒漢，一路都唔知道自己原來有咁嚴重嘅問題，直至到喺幾個月前嘅一日，佢哋兩個走去望一望啲金、銀、銅、鐵、石油價，先至開始「接受」自己有問題。「接受」永遠都係戒毒、戒酒、戒濫發鈔票嘅第一步。
當然，各國央行抽水雖然提供跌市嘅理由，不過，咁唔等如今日抽水就今日市跌。所以如果要捕捉最好時機去賣貨，甚至拋空、或者買啲跌市會贏錢嘅嘢（例如認沽證、熊證），最好用技術分析睇吓啲圖表有乜嘢講。世界有好多主要指數，已經跌穿200日平均線，咁樣已經畀好大跌市啓示。仲有，如果有主要平均線跌穿另一條平均線，就會有確定跌市趨勢嘅作用。
熊證6204 你買咗未
花旗國納斯達克指數同日本嘅日經平均指數嘅50日平均線，都已經跌穿200日平均線，我相信其他世界主要指數一定會跟隨。最能反映花旗國股市嘅標普500指數，已經下試6月低位，得我哋嘅恒生指數仲喺高位。
希望大家已經買咗我喺7月5日用隻金手指為大家篤出嚟嘅熊證6204。恒指淨係追番標普500指數嘅跌幅，大家都可以贏大錢，更加唔好講如果真係有股災會點。
孫柏文