侍仔：雖然假波案已經審結，但係冇球員被起訴似乎太唔合理。
招積域：世事就係咁唔合理㗎啦，但總要搵人出嚟孭咗隻鑊，大粒佬咪食晒囉。施丹撼人嗰單嘢，開記者會話解釋件事，但我都唔覺得佢係講真話。呢類球員衝突，當笑話笑吓佢就算啦。
尼維特又去卡塔爾？
菠蘿文：球場暴力日日都有，我哋踢波成日問候人哋媽媽啦。聽講暑假有外隊訪港，係上海申花。
侍仔：嘩！乜戲碼咁勁呀，今次搵中超球隊。係咪貪佢有贊卡同埋吳偉超先？哈哈。我真係第一次喺香港睇中超球隊踢波，唔知戲金係咪好高呢？
招積域：我估都唔少啦，內地球隊啲獎金好重本，但講真呢個戲碼真係唔吸引我去睇，我只係識吳偉超同贊卡，後者仲要係過氣德國國腳。
菠蘿文：要睇呢類國腳，不如請卡塔爾嗰邊嘅球隊，大把歐陸球員去咗掘金。
侍仔：聽講尼維特話會去掘埋一份喎？
招積域：唔會啩？佢點都係一代球星，唔使咁早去「享受」足球啩？
菠蘿文：人各有志，哥廸奧拿同巴廸高臨退休前都去嗰度玩吓。
侍仔：但唔知嗰邊用外援呢招，係咪對提升足球水平有幫助呢？
招積域：呢樣就唔知，但一定好好噱頭，由艾芬保到巴廸高，一代球星同場較技，幾好睇。
菠蘿文：侍仔你又話學韓文嘅，有冇咩嘢進展？
侍仔：𠵱家南韓女友教我，因為英超有朴智星同李榮杓呢類南韓球員，睇波學韓文。好似以前睇意甲都可以學意大利文單字咁樣，波唔單止用嚟睇嘅。
高洛文