所謂近廚得食！不過做茶餐廳嘅芳姐就話：「打貓（偷食）？未死過咩！都係偷師實際啲，學識可以煮畀一家人食！」芳姐家有3條Queen，最鍾意就係佢煮嘅茶記風味餐，「跟茶記份Menu煮，真係一個月日日唔同菜式都仲得！更重要係嗰份熱辣辣嘅鑊氣感覺，邊個敢話屋企餸唔好食！」
記者︰劉昱蘭 攝影︰陳盛臣
示範︰元朗讀者芳姐
鳴謝︰大利茶餐廳(24592992)
菜肉魚食得均衡
價錢︰$35/4人
需時︰15分鐘
芳姐大囡剛上中學，真係份外要注意均衡飲食！茶記晚晚熱賣嘅金菇肥牛煲，有菜有肉就最啱喇！不過芳姐再加點心思，將囡囡至愛的蟹柳夾在其中，變成菜、肉、魚樣樣齊！
材料︰火鍋肥牛1/2磅、蟹柳8條、金菇11/2包、胡椒粉、鹽、糖及豉油各1茶匙、蒜茸少許
火鍋肥牛$26.9/包（c）
蟹柳$10.5/250克（b）
金菇$8/2包（a）
簡易法
1.用肥牛捲起金菇蟹柳，撒上胡椒粉及鹽醃5分鐘後，煮熟；
2.切好蒜茸落鑊，加糖、豉油及鹽煮成芡，淋在肥牛卷上。
茶記貼士︰茶餐廳做法，最重要係唔好洗肥牛，因為洗過水，一煮就會出水，沖淡晒啲味！
節瓜做蝦餃？
價錢︰$25/5人
需時︰20分鐘
二囡係海鮮迷，最鍾意食蝦，芳姐晚晚睇住釀節瓜個Menu，想出了以魚肉釀入其中，再以蝦仁放面點綴；阿女食完話勁清，味又夾，仲將呢味餸戲稱為「節瓜蝦餃」，你就知佢有幾好味！
材料︰節瓜2個、鯪魚肉1/2斤、蝦仁4両、蛋1隻、胡椒粉、生粉、鹽、麻油、水適量
節瓜$6.9/斤（c）
鯪魚肉$7.7/包（b）
蝦仁$18.3/包（b）
簡易法
1.蝦仁洗淨，以胡椒粉及鹽略醃；
2.節瓜切件挖通，釀入魚肉，蝦仁沾生粉放面，蒸15分鐘；
3.水、生粉、鹽、麻油落鑊滾一滾，倒入蛋白成芡，淋上已蒸好節瓜即成。
茶記貼士︰除非好鍾意食魚！否則應用豬肉代替鯪魚肉，事關豬肉冇咁易出水，味道仲香啲。
香口惹味呃細路
價錢︰$15/4人
需時︰10分鐘
細妹最嘴刁，唔鍾意食甘笋，尤其煲過湯後，腍腍嘅口感，一定令佢「絕食」；不過細路仔又點可以偏食呢？芳姐諗炒絲就最爽口，再撈多啲料，等佢唔覺唔覺食咗啲甘笋絲咪得囉，最後咪搞到個炒六絲咁足料。
材料︰雲耳及貢菜1両、豆亁2塊、甘笋1條、芽菜1/2斤、青瓜1/2條、鹽1/2茶匙、糖2茶匙、麻油少許
貢菜$8/斤（a）
甘笋$9.9/公斤（c）
豆亁$2/件（a）
簡易法
1.所有材料洗淨切絲；
2.依次將雲耳及貢菜落鑊略煮，再加入豆亁、甘笋、芽菜及青瓜；
3.最後鹽糖調味，上碟加麻油。
茶記貼士：茶餐廳鑊氣夠，同屋企冇得比；師傅教落，畀啲耐性，燒紅隻鑊先落料，可以同樣有鑊氣效果。
瓜質亁身
勁惹味
價錢︰$20/4人
需時︰15分鐘
材料︰勝瓜12両、百合1個、龍蝦丸及火腿丸各1/2磅、鹽1茶匙、薑2片、油適量
勝瓜$8/斤（a） 龍蝦丸$26/磅（b） 火腿丸$18/磅（a）
簡易法
1.雙丸汆水；百合撕成片；
2.油、薑及鹽爆鑊後炒勝瓜，加入雙丸略炒，放入百合焗10-15分鐘即成。
茶記貼士︰茶餐廳一定係亁炒勝瓜，因為勝瓜一出水，炒完又黃又黑，亁炒最穩妥。
酒醉田雞
味夠鮮
價錢︰$45/5人
需時︰20分鐘
材料︰田雞2斤、雲耳2両、鹽1茶匙、黃砂糖及糯米酒各2茶匙、生粉及豉油各11/2茶匙、水約6碗
田雞$20/斤（a） 雲耳$7.9/40克（c） 黃砂糖$9.5/350克（c）
簡易法
1.田雞以鹽、黃砂糖、1茶匙糯米酒、生粉及豉油醃好，炒至轉色；
2.加入雲耳、1茶匙糯米酒及水，滾15分鐘即成。
茶記貼士︰如果要做茶餐廳風味，要以「赤肉」煮田雞，意即抽起醃肉步驟，據知田雞味會更鮮。