財務Ｗ二十年前自北京來港，因為一連串嘅巧合，跟過左丁山學師；財務Ｗ畢業自內地著名大學，但英文唔多掂，喺中環好難升上高職，不過左丁山見佢勤力肯學，從低級職位做起，絕不埋怨甚麼新移民歧視，學歷歧視，一味肯做，於是破格升佢做主任。正是莫欺少年窮，財務Ｗ出外闖蕩，因緣際會，大公司請咗佢，立即派佢長駐北京做經理，利用佢嘅北京關係。財務Ｗ估唔到行個圈，返到起步點，索性將老婆與獨子搬回北京，久唔久先至回港一行。
小六升中派位之日，財務Ｗ突然打電話嚟：「左生，你識得咁多人，可唔可以介紹我個仔入英文中學讀中一，我想佢返嚟香港讀書。」香港噃，邊度有後門可走呀，一口拒絕之。財務Ｗ有啲失望，左丁山勸佢為兒子申請直資學校、國際學校，但財務Ｗ話佢負擔唔起。
點解要返嚟讀書呢？財務Ｗ公子在北京讀著名小學，成績極好（只係英文與香港學生有距離），升學前途會好順暢。但係財務Ｗ講：「你有所不知，我係為咗醫療先至想送佢返香港讀書。一個月前佢病咗，身體高溫不退，送佢到最出名嘅醫院，醫院竟然派幾包『板藍根』就打發我哋走。幾日後再送個仔入醫院留醫，住咗一個禮拜仍然發燒，醫生叫我兩公婆入房，請我哋作好思想準備，個仔可能患上癌症，我老婆即刻喊到眼腫！我忍住眼淚，辦理兒子出院手續，第一時間上飛機返香港，搵番一個我識嘅醫生，醫生送我個仔入私家醫院檢查，我忍唔住喊到收唔到聲，悲苦過送我阿爸上山。唓，驗過之後，發覺乖仔乜事都冇，針到病除，三日後乖仔好番晒，活潑到極。於是我兩公婆為咗佢以後嘅保健，都係送佢返香港讀書好過。」
香港醫療水平確實係先進過內地好多嘅──領導人嘅保健除外，財務Ｗ夫婦受驚嚇一次，唔想試第二次，送子回港未嘗無理，但如何入學呢？今年搞唔掂，明年佢去教統局求教求救可也。