不利股市的政經消息，接二連三出現。息口上升，美加息、日加息、中國又話要加；以色列同黎巴嫩打起上嚟，中東局勢突轉緊張；原油價格屢創新高，紐約期油曾逼近80美元，中東衝突如再升級，油價本周會進一步上升。
接連受不利消息打擊，美股連續3日急挫，杜指一共跌咗400點，市值蒸發達5000億美元；港股亦大跌兩日，唔見咗386點，上周五險守16000大關，最低16062，20日線（16102）同50日線（16108）一度失守。由近日高位16607回落，下跌約540點。
自對沖基金加強入市力度後，股市的升跌，都比市場預期的快和急，唔單止幅度較大，周期亦比以往的為短。早幾日講過，對沖基金玩「浪」，短短3個月（3至6月），恒指可以大升12.9%後，又再插番低12.2%；6月中開始嘅升浪，由15205到上周一高位16607，升咗9.2%，應該未夠喉，市勢逆轉，主要係受政局影響，唔排除對沖基金借勢插一轉，洗一次好倉，然後再玩過。
大行調高盈利預測
港股上月底有一個大型上升裂口（15916至16125），在今次調整中有可能補回，若調整今個升浪的0.5倍，恒指剛好係落到15906。政局難測，但有危亦有機，短期恒指若能守穩在16000水平，後市仍會再度發力。
油價同金屬價格大幅上升，黃金價格已重上664.15美元，上星期急升32.5美元；10月期銅由6月13日的低位293.7美仙大幅反彈，上周五收367.95美仙，同5月11日的高價382美仙只相差3.6%。
5月中銅價創新高，江西銅業（358）股價亦飆升到9.75元，上周五收7.75元，同高價相差20.5%，落後銅價表現，未升夠。本周金銅價格再升，江銅有機會重遊高位。
江銅走勢近兩個月來形成複式頭肩底，升破7.55元頸線後升上8.45元，上周整固，後抽亦應完成，以複式頭肩底形態衡量，短線量度上升目標係9.55元。
江銅係內地最大的銅和黃金生產商，由於產品價格上升，大行已紛紛調高江銅06年的盈利預測；目標價方面，瑞信睇9.30元，大華繼顯睇10元，德銀最樂觀，睇10.30元。
郭兆誠