梁振英同劉山青，一個親中一個反共，究竟有乜嘢可以令佢哋坐埋一齊呢？就係英皇書院。為咗慶祝母校80周年校慶，兩個政見南轅北轍行事差天共地嘅大男人唔只同枱食飯，仲一齊上台表演節目，拉埋民主黨前議員羅致光三個人做棟篤笑話當年。
話說梁振英、劉山青同羅致光三十幾年前係同班同學（1971F5畢業），喺英皇讀中學。羅致光在校內係風頭躉，唔止讀書叻，又識彈結他唱歌。劉山青成績亦好好，數學尤其突出，不過就好百厭，屬於激死老師嗰隻。咁英皇在官校之中赫赫有名，學生唔會水得去邊，隔一條馬路就係港大，入到英皇等於半隻腳入咗港大，畢業後，羅致光同劉山青順利過咗對面馬路讀大學。
但係梁振英就冇咁好彩，八方聽佢啲同學仔講，梁當時屬於平庸一族，大家唯一記得佢嘅軼事，就係佢本來好細粒，唔知點解F4嗰年，一個暑假放完返嚟，竟然高咗半呎！後來梁振英入唔到U，去咗理工，之後再去咗英國讀測量師，之後仲發咗達，在商界政界都吃得好開，讀書叻過佢好多嘅劉山青就做咗政治犯。
劉山青通校奔跑
咁呢個奇特三人組上台，當然唔係論政而係懷舊。英皇係男校（預科收女生，但極少數，地監局嘅陳佩珊同《壹週刊》潘麗瓊就係罕有嘅男校女生，當晚都有到），學生要打呔，佢哋流行一個「閹呔」的傳統，就係學生買咗新校呔之後，會俾人強行搣咗新呔後面嗰張招紙，叫做閹。咁絕大多數學生都唔想俾人閹，佢哋一係匿埋，一係就被人㩒低，獨係劉山青為咗唔俾人閹，通校奔跑，追到大家索晒氣！所以今日佢成日去示威去引警察追，真係完全唔出奇。
早排三個老同學約好敍舊，後來羅致光話取消咗，有人誤會梁振英「唔識人」，其實只係羅致光冇到，劉山青同梁振英都有到，仲傾咗成朝。今次慶祝校慶，梁振英買咗張枱，請埋劉山青，佢亦欣然赴會。同學少年，大家縱然政見不同，亦唔一定要親疏有別嘅。當晚，劉山青講咗一句說話，八方覺得好值得quote：「最難得友誼」。唔黨同伐異，真係好難得。