意大利前鋒多如天上繁星，唔知大家仲記唔記得以前有個「超新星」，𠵱家轉咗去皇馬嘅「火山面」卡斯辛奴。唔係好留意西甲嘅球迷，分分鐘以為佢已經退出咗球壇，因佢養尊處優，比起啱啱由羅馬加盟嘅時候，重咗7公斤（約15磅），咪話唔嚇人！
與卡比路續前緣
卡斯辛奴由巴里以1900萬歐元轉投羅馬，再以550萬歐元加盟皇馬，身價大跌；從天堂跌落地獄，由「超新星」變做「超流星」，再由初出道嘅71公斤壞孩子，搖身成為𠵱家嘅83公斤（逾182磅）大肥佬，過程有啲似「真人SHOW」情節！
皇馬新官上任，估唔到「火山肥佬」同新教練卡比路再續前緣；當年後者一直畀機會佢改過，照理肥佬都應該用表現報答番人哋嘅知遇之恩。不過今時唔同往日，「火山肥佬」去到西班牙好食好住，又唔使點踢波，得1米78嘅佢成83公斤咁重，想威都唔易。
據知，肥佬喺球會跑3千米嘅操練時，佢係成隊跑得最慢嗰個（肥哨好彩受緊傷），隊醫仲警告佢，至少要纖體到76公斤先勉強達標，認真該煨！此外，仲有人話我求大俠知，肥佬喺世盃期間同埋班豬朋狗友去咗薩丁島度假，冇人性到唔理正在安胎嘅老婆同骨肉，你話呢個今年先24歲嘅衰仔抵唔抵幫呀？
「我求大俠雖然未有仔女，但如果自己個仔第日變成卡斯辛奴咁，我肯定會七孔流血，見到佢就眼火爆，到時唔知打死佢好，定係同佢脫離父子關係好？唉，生性啦！」