中東局勢緊張，油價新高，美股再跌。杜指上月13日最低10706，本月7日上到最高11257，升幅551點，上周五最低10701，同上月13日最低差唔多，打回原形，最後收10739。
短期港股都係捱打局面，但美股回見6月低位有望守得住。趁港股回軟，睇位低買C輪博反彈。
國壽C輪3599：國壽（2628）上周收12.20元，1周跌0.20元。吼國壽回落到11.80元，買C輪3599博反彈。隻輪10月初到期，輪價1.59元，溢價3%，槓桿率7.7倍（有效5.9倍），引伸波幅35.7%，數據唔錯。
有隻熱門C輪3890，11月中到期，輪價77仙，溢價18.5%，槓桿率15.8倍（有效6.3倍），引伸波幅44.5%，咁嘅數據，屬高危貨色，咪貪佢易買賣而手多。
中銀C輪9950：中銀（2388）上周收15.10元，1周跌0.15元。吼住回落到14.80元，買C輪9950。隻輪10月中夠鐘，輪價43.5仙，溢價4.7%，槓桿率34.7倍（有效14.1倍），引伸波幅21.3%。
另外可以諗嘅係3641，11月到期，波幅冇咁大，交投較疏，買賣冇咁易。
聯通C輪9846：聯通（762）上周收6.70元，1周跌幅0.45元。雞仔注買C輪9846，12月初到期，輪價96仙，溢價4.6%，槓桿率7倍（有效5.2倍），引伸波幅33.1%。
章盛