自從領匯接手管理房委會180個商場及停車場後，就決心大改革，好似最近完成翻新慈雲山中心後，人流多咗好多，領匯行政總裁蘇慶和自然開心。但佢都好緊張其他商場情況，就算放假都會到唔同商場巡視，睇吓有乜嘢可以改善。
蘇總噚日出席慈雲山中心活動，同記者講行商場可以增加夫妻感情，好多記者都唔明點解，蘇總就解釋話行商場嗰陣老婆都會在旁，即係拍住拖咁行，久而久之兩人相處時間多咗，感情就會倍增。除咗感情好，佢話行商場另一好處就係可以買平貨，好似噚日就用29蚊買咗條短褲，認真超值。蘇總又大讚老婆捱得苦，就算叫佢入女廁睇吓污唔污糟都永無詐型喎。各位男士如果想搞好夫妻關係或買平嘢，不妨學蘇總咁同老婆行屋邨商場啦。