抵食，好多定義，每碟十元八塊先叫抵食？唔可以話你錯，不過擺低$880食一客動輒幾千甚至過萬嘅正宗懷石料理，我一樣覺得唔貴！呢客日本新興嘅酒懷石料理絕無取巧，食嘅係夏季時令食材，仲要8道菜細意配搭8款日本佳釀，$1,000有找換到五星級享受，唔止我受落，連CoCo都話好抵。
記者：方綺君 攝影：譚盈傑
歎懷石裝修要Grand
懷石料理（Kaiseki-ryori）菜式一般以簡素為主，用料非常講究，供應懷石料理嘅餐廳重視環境布置，多數會用山水畫、人造瀑布、假山或水池之類營造大自然氣氛，今日介紹嘅「原澗」半年前重新裝修，有木製大門加落地玻璃、獨立座位，推門即見巨型酒樽擺設，齋睇裝修都唔嘢小。我雖然身為食版記者，不過都係第一次接觸懷石料理，為免老點各位讀者，所以搵嚟對日本料理好有研究嘅Coco試食。
每道菜各配清酒
CoCo師奶一名，有個日本老公小松本，曾經喺煤氣烹飪中心教日本菜、做過亞洲電視烹飪節目《下午麼麼茶》主持，秉承師奶慳家優良傳統，絕對係個稱職試食專員，佢話：「喺日本食懷石料理一般都要過萬Yen，幾十萬Yen嘅懷石料理我都見過，呢度$1,000有找，食材夠新鮮，仲配埋特選清酒或者燒酒相配，一個字形容──抵。」睇完價錢試味道，Coco話：「凡鯛魚一定係海魚，𠵱家係盛產期，北海道新鮮運到好清甜爽口；鮑魚海膽燒用嘅係九州鮑，配秘製鮑魚肝味噌醬，烘後好香濃；至於梅乃宿梅酒呢，我都係第一次飲，酸酸哋又有少少梅茸，下次嚟我一定會再試。」睇誠意，餐廳嘅平師傅同經理要逐一試勻百幾種酒，冒住飲到肝硬化嘅危險同大家試出各道菜嘅最佳配酒，呢份誠意，抵撐嘞啩？
1.懷石小點
左起佐酒小吃鱧魚煎餅，中間是萬願寺浸汁，用時令福岡萬願寺青椒配日本豉油及木魚水，右面是日本小芋伴海膽燒，加秘製海膽醬烘燒香甜石川芋頭，份量小夠滋味，配微甜溫和的出羽櫻大吟釀餐前酒，為酒懷石料理打響頭陣。
2.鱧魚、松茸清湯
用九州鱧魚和名貴日本松茸烹調，營養豐富香濃惹味，配味道濃郁的水芭蕉‧特別本釀造，能將鱧魚的鮮味和松茸香味完全散發。
3.金目鯛刺身
7至8月是鯛魚盛產期，CoCo話：「鯛魚係貴價食材，日本皇室送禮都送鯛魚㗎。」配真澄山花‧純米大吟釀，此酒有「狀元清酒」美譽，純度高而味道清淡帶甜，有助馥郁細膩的魚肉鮮味在口中揮之不去。
４．鮑魚海膽燒或和牛伴鵝肝
主菜二選一，鮑魚海膽燒用的是日本鮮鮑，加入秘製鮑魚肝味噌醬煮海膽，很香口；和牛伴鵝肝用的是A5級澳洲和牛和法國鵝肝，Coco：「略嫌照燒汁有啲啲燒焦。」不過呷一口矜貴高純度的古酒‧古天1997，入口香滑，丁點瑕疵已拋諸腦後。
5.煮冬瓜饅頭
賣相如饅頭，小小冬瓜釀入木瓜、日本銀杏、鮮蝦肉和本菇，每一口也有冬瓜茸及木魚水汁，充滿驚喜。喝雪至凍冰冰的梅乃宿萬葉‧純米大吟釀，散發着淡淡怡人的荷葉清香，讚！
6.紫蘇葉伴魷魚明太子天婦羅
九州文甲魷魚釀入辛辣鱈魚明太子，再用福岡紫蘇葉包着炸，入口絕無油膩感。吃此道菜宜飲燒酒芋燒酎，Coco︰「好多日本男人鍾意飲，不過我唔係咁受得隻味。」
7.冷稻亭烏冬
我的最愛！份量多，優質手打稻亭烏冬清新有嚼勁，剛才食的幾道菜式味道較濃，現在味蕾能稍作休息。Coco激讚：「全港唯原澗獨有嘅梅酒梅乃宿，味道香甜，真係可以飲完一杯又一杯。」
8.清酒雪糕
自家製清酒雪糕伴灑上金箔的上善如水清酒啫喱，上善如水是隻日本非常受歡迎的清酒，CoCo話：「酒勁滑，係入口直落喉嚨講唔出嗰種感覺嘅滑。」吃畢，是酒懷石料理的完美總結。
$880貴唔貴？
Ashley
「之前同屋企人試過食$2,000一客，𠵱家$880抵喇。」
Honey
「聽講懷石料理千千聲一餐，𠵱家$1,000有找，都會試嘅。」
阿龍
「$880？差少少就係我1個月飯錢喎！」哥哥仔，食懷石料理唔同食魚蛋粉。
懷石料理來源
懷石料理原本是供應禪師的點心，「懷石」一詞，則有「懷中抱石」之意。話說某日天寒地凍，禪師飢腸轆轆，便命弟子生火煮石，把溫暖的石頭抱在懷中取暖，於是「懷石」一字，便代表了消除空腹感的輕食，一般包括前菜、吸物、刺身、煮物、燒物、揚物、酢物、食事和果物，吃一頓，分分鐘要花上2小時。至於日本國酒清酒，必須用米、米麴和水為原料發酵過濾，大致分為不同等級︰本釀最低級，接着是純米酒、吟釀、純米吟釀、大吟釀，最高級則是純米大吟釀。
原澗（28828616）
地址︰銅鑼灣新寧道新寧大廈地舖及1樓
營業時間︰
-壽司吧：星期日至四12:00nn-3:00pm，6:00pm-11:00pm，星期五及六延長營業時間至11:30pm
-清酒吧：星期日至四6:00pm-11:00pm，星期五及六延長營業時間至11:30pm
座位︰分清酒吧、壽司吧和傳統日本爐端燒3部份，約有120個座位
人均消費︰午膳$120、晚膳$400-$800
交通︰設代客泊車服務
註：原澗酒懷石料理（由即日起至8月31日供應）