資深股
票客戶謝太：Karen，睇嚟我都係鬧錯你。雖然你三個禮拜之前，已經叫我唔好入市，因為我見個市一路回升，就係咁鬧你。而家真係好似你講過咁樣，個市好似唔妥。
年輕貌美經紀Karen：係呀謝太，個市真係開始好唔妥。不過我都要道歉，因為始終都係早咗三個禮拜叫你買恒生指數認沽證。早知道就唔會咁早叫你買。
謝太：「有早知，就冇乞兒」，你又唔係「先知」，早咗三個禮拜算好啦！呢三個禮拜，我每一次手痕想買股票，你都㩒住我，已經幫咗我啦。你話過，聯儲局好注視嘅「通脹核心指數」有一半比重係用租金計算，而因美國樓市爆煲，好多人負資產、供唔起樓，被迫租樓。又因呢幾年個個買樓，冇人租樓，好多租盤都畀人賣咗，租盤自然少。而家突然間又有咁多人租番樓，美國租金就開始升。以前聽你咁講，都好似聽故仔一樣，不過上個禮拜，我有個移咗民去美國嘅親戚，打電話嚟同我傾計，至明白到呢個現象有幾嚴重。
Karen：真係？你親戚點講？
謝太：佢話佢住嗰度，舊年呢個時間，啲租盤就算免租、送管理費，都冇人住。今年就完全唔同，租盤出現短缺，租金都升咗十幾巴仙。咁我就諗，如果租金升15%，租金又佔「通脹核心指數」一半比率，即係話要個通脹指數低啲都幾難。
美息會一路加
Karen：聯儲局主席伯南克曾經講過，「通脹核心指數」要維持喺2%以下。如果租金真係升咗15%，其他嘢就要有嚴重通縮先至可以令到「通脹核心指數」維持喺聯儲局可接受嘅程度。不過就算大陸出口貨品繼續跌價，都唔可以彌補到租金升幅。聯儲局今次真係唔想加息都要加，仲係會一路加落去。到時就好似98年咁，將啲錢做定期存款，好過炒股。如果個個都將會咁做，股市都就有排跌，仲要跌得好甘，分分鐘會跌到年尾。世界股民就好似喺海灘上玩得好開心嘅遊客一樣，不過而家潮水突然急促下退嘅一刻，我就算同大家講叫沽，都未必個個會聽。呢個海嘯雖然冇得阻止，不過最起碼都仲可以自保。
買6211或6205
謝太：尋日我聽完美國親戚嘅電話，同我老公傾偈，佢話雖然唔明乜嘢係「通脹核心指數」。不過佢話如果我要買市跌，應該問下Karen你關於新產品牛熊證，佢話可能會好過買傳統認沽證。
Karen：呢個就睇你信唔信我真係咁準啦。牛熊證有個莊家通殺價，如果買市跌就要相信個市升唔到去個通殺價。咁啱啲熊證嘅通殺價，就喺今年全年個市嘅高位度。如果你信我話個市會跌到年尾，同埋今年已經見咗頂，你可以吼啲年尾到期嘅熊證，例如6211或者6205呢兩隻。