搞到全城瘋狂嘅中國銀行，6月1日喺香港上市之後，除咗令到唔少股民有進賬之外，仲帶挈埋佢哋其中一間御用律師行君合，成功喺香港開事務所，間行嘅合夥人劉林飛話，十年前已經打算喺香港開分公司，申請表都遞過好幾勻，次次都冇回音，直到近排收到風，話應該冇問題，咁咪再申請囉！
劉林飛話，家吓已經請咗十幾個本地律師坐鎮，佢哋全部都熟知中國法律，事關間行大部份嘅客仔，都係內地來港上市嘅企業，唔熟兩地法規又點湊得掂班客呢？
雖則話喺香港開咗檔，但劉林飛話自己唔會坐定定，依舊會港京兩邊走，仲話嚟過香港好多次，但都係頂唔順又熱又濕嘅天氣，唔好話行嚟行去，就算齋企，都可以成身汗；之不過，好彩佢食得慣香港嘅嘢食，否則就真係唔知點算囉！