朱立老師榮休，離開香港返台灣定居，佢一班學生周六晚喺中大搞咗個小型歡送會為老教授餞行，雖然風大雨大，但報咗名嘅都到齊，大家玩得好開心。
朱立老師75年加入中大，86年任新聞與傳播學系系主任，後來又去咗浸會，做浸大傳理學院講座教授兼院長。在香港31年間，教出不知幾多新聞及公關界人才，當晚有嚟食晚飯嘅，有李少南、蘇鑰機、吳明林、馮強、李國基、張圭陽、張樹槐、梁鳳儀、張國良、馮德雄、黃麗君、李玉蓮、盧愛玲、馬嶽……單係朱老師呢一晚嘅學生，run一個電視台都綽綽有餘。
朱老師特別寫咗篇長文送畀同學，叫做《情繫香江，三十不離》，由點樣偷渡來港講到去台灣讀書到返港教學，由中大嘅「地下工作」寫到浸大嘅「革故鼎新」，洋洋四千字，抒懷論學。佢話：「高等教育本應少食人間煙火，多點特立獨行，才能高瞻遠矚，批判進取！」值得所有佢嘅學生——特別係成日走堂嗰啲讀一讀。