踏入7月，唔少商界高層都陸續放暑假，傾完國泰百億買港龍單大Deal嘅范鴻齡，都話會乘機唞吓。之不過身居要職，唔可以好似啲學生哥咁，一放就個幾兩個月，佢話會分三段時間放假，諗住會先後去東京、美國行吓街，再去菲律賓潛水，前後加埋都有兩三個禮拜。
范鴻齡家吓貴為行會成員，又係中信泰富董事總經理，但佢話大學畢業之前，年年暑假都有做暑期工，幫補吓生活費。咁做乜暑期工呢？如果大家好似華華咁，諗住佢都係做吓補習老師之類，咁就只係估中咗一半。
范鴻齡話，中三至到大學畢業，自己確實係做補習，但佢第一份暑期工，係幫阿媽穿膠花，唔知佢阿妹羅范椒芬，嗰時有冇做埋一份呢？佢仲話，有一次幫阿媽攞啲膠花去間廠度，唔小心整唔見咗部份貨，當時直頭嚇到成身標冷汗，事關俾人鬧事小，要賠錢事大，好彩最後個負責人都冇怪佢。
幫人補習月賺$90
穿膠花搵到幾多？范鴻齡已經唔記得，但幫人補習有幾多薪水佢就記得一清二楚。佢話，當年暑假幫三兄妹補習，逢星期六上門補個半鐘，月薪有90蚊，每個鐘即係15蚊，暑假之後，唔知係自己教得真係好掂，定係勝在收得唔貴，所以有得繼續做落去，但人工就冇再加過喇。
李華華
讀者如有任何意見或報料，歡迎發送電郵至[email protected]。