向來都有人講《女神》系列難玩到飛起，世界觀又Hardcore唔夠商業化，廠方於是於10年前推出咗首隻學生哥外傳《Persona》，成功借替身概念另起爐灶。由於幾年前嘅《罪與罰》口碑好壞參半，製作人於是痛定思痛，將呢個系列正斗之處無限擴大，再加上恍如《心跳回憶》咁款嘅媾仔媾女橋段，變成甚有意思嘅今集喇。淨係睇佢型到爆燈嘅造型設計，以及超水準美術構圖同音樂，Fans呢4嚿水絕對唔慳得！
文：陳福榮
稱得上做《Persona3》，系統一定要保留原有風味，以切合外傳身份，例如學校舞台、Persona系統等。雖然仍係正邪大戰，但着眼點就放喺校園生活入面，即使夜闌人靜要去除魔逐妖，主角日頭都要返學，約會同出席課外活動，兼且時間表圍繞住成個高中二年級嚟玩，真係同自己去返學無咩大分別。
故事方面，話說每日凌晨12點，就會進入正常人感覺唔到嘅影時間，邪魔就會出沒侵蝕喺嗰陣仲有知覺嘅人，令佢哋失去靈魂變成活死人。而主角咁啱轉校轉到呢區，俾人揀中入住宿舍仲遇到怪事，結果引導咗體內潛在嘅Persona能力，仲成為眾隊員嘅首領㖭，聽落有啲似《Eva》喎。
校園生活提升能力
除非突發事件，玩家每日都係「日出而作，日落而息」，唔少時間放喺學校度。有時上上吓堂老師會突然間嚇你一驚，問你或者同學仔諸如「一加一等於幾」咁嘅題目，只要答啱就可加「魅力」。放咗學你可以走去商場或者快餐店試新嘢食，咁又會加「勇氣」，假如做乖學生肯留喺圖書館或者臨瞓前鋤吓書，呢個則有得加「學力」。呢啲Point其實可引發特殊事件，即係話你唔單止要狂打怪升lv，就連個人修為都要做足。
另一方面，佢亦容許玩家結交朋友甚至係異性好友，經過約會或者各種事件嚟增加Commu（溝通值），從而幫助合成Persona時有更多着數。呢方面最花時間同心機，好難得一想二，譬如你有個男同學想約你放學去街，同佢Friend就可以加「魔術師」嘅Commu，但咁就無法出席學會活動，令學會班友對你印象打折扣。至於學會初頭就有游水、劍道同田徑畀你揀，每個都有相應嘅Commu，但又只能3揀1，即係話玩家唔可以好貪心咁儲晒所有嘢咯。
追女仔方面就仲似《心跳回憶》，雖然有唔少女仔畀你揀，但千萬不可做花心蘿蔔，原因係佢哋會互相有影響，萬一你做情聖穿煲就死多2錢重，所以做人都係專心啲好。
主動出擊掌握戰況
《Persona3》喺戰鬥有唔少改動，迷宮唔再係固定版圖，次次唔同，極有《DQ》肥佬商人嗰隻感覺。基本上除咗某啲戶外版圖外，絕大部份要同敵人周旋嘅迷宮都係自動生成，樓梯與寶物位置隨機決定，每次玩都要重新搵過，若玩RPG嘅經驗少啲真係人都癲。皆因敵人會喺版圖內不斷遊走，接觸到佢哋就要進入戰鬥，所以靜雞雞走近再按掣偷襲係致勝不二法門，事關今集增設嘅「無限加Turn」絕對唔講得笑，我方先發制人攻擊就經常做出一擊死EasyWin，但若然被人先攻嘅話就隨時死咗都唔知咩事。
鑑於主要迷宮塔係以幾層做一個單位，而我方成員打多幾場仗就會呈現疲態影響戰鬥力，因此正確攻略法係起初不妨逐層「掃場」，拎齊晒道具同執吓錢賺吓經驗值，當體力不支就撤離休息。下次再返去就唔使理經已完成嘅層數，迴避所有無謂戰鬥直接搵樓梯走，否則玩一世都爆唔到機。但若然被敵人發現又點算？原來只有俾敵人接觸到主角先會進入戰鬥，加上佢哋唔會進入某啲位置，因此即使被發現其實仲有時間走佬，藉以保存體力。
畫面正到暈
由白面長鼻人依歌魯負責嘅VelvetRoom，今次當然唔會少咗佢嗰份，基本上合體原則都同每集《女神》無咩分別，只係將啲種族變晒做唔同塔羅牌。佢亦增設咗《真女神3》開始引入嘅「惡魔全書」系統，只要用錢就能夠買番登錄咗嘅Persona，換言之慳番唔少補魔時間，諗番初代嗰種瘋狂儲卡滋味真係惡頂到暈。
講開又講，好多人都話《FF》同《VP》畫面好正，但唔好意思《Persona3》真係超晒班，佢出色之處並唔係同你鬥多邊形，而係好畀心機整靚每個環節，至啱鍾意DesignFeel嘅玩家。順帶一提，隨遊戲附送嘅特典光碟，內容可謂份量十足，除咗有意料之內嘅靚靚壁紙同螢幕保護程式外，仲有配音員嘅音效俾你安裝落《Windows》度。此外仲有幾首正音樂，抵死嘅係佢哋分別係以CD音源與MP3制式收錄，擺明配合大勢所趨，抵讚！
Profile
機種：PS2
廠商：Atlus
類型：RPG
人數：1人
價錢：$448（連特典）
