講到扮靚，我都算係半個專家！皆因我不時都會吸收扮靚知識，充實吓自己。前幾晚，聽緊一個電台節目，一位好出名嘅星級化妝師教人扮靚，我梗係洗耳恭聽，但就俾佢一句說話嚇親，搞到我差啲打瀉手上杯抹茶latte。(＞_＜)
佢話：「用痔瘡膏搽眼袋，可以收緊眼袋。」吓！痔瘡膏喎，乜唔係搽喺ｘｘ嘅咩？搽眼袋都得？我之後同個friend講起呢單料，佢都係眼都突埋，但之後一邊摸住個眼袋，一邊喃喃自語：「真係得？試唔試吓好呢。」我梗係即刻㩒住佢話：「等我問吓醫生朋友先啦。」(~.~)
皮膚專科醫生陳衍里話，呢個傳聞真係時有所聞，相信係因為眼袋部份成因，係眼部血管腫脹，搞到眼部下方出現微微脹起，而痔瘡膏就係有收縮血管作用，所以有啲人就諗，可以用嚟收眼袋，「但根本無醫學根據。」
「唔好亂試呀！」佢解釋，眼袋仲有其他成因，例如天生眼部脂肪較多，搽咗痔瘡膏都無用，而且，亂咁搽啲藥落幼嫩嘅眼部皮膚，好容易有敏感性發炎㗎。佢話平日睡眠充足，做多啲運動就唔怕有眼袋，如果問題嚴重，就應該搵醫生睇睇啦。
另一位皮膚科醫生史泰祖話，又有一種說法話痔瘡膏嚟除黑眼圈，原理都係差唔多，幫助收縮眼部血管。不過，佢話平日少食鹹嘢，瞓覺時枕頭唔好太低，就唔會搞到水腫，出現眼袋。(^_^)
逢周一刊出