退咗休嘅體育新聞報道員伍晃榮，噚日喺車淑梅港台節目《舊日的足跡》錄音訪問裏面，重提林尚義（阿叔）笑佢主持無綫世界盃日誌環節時，似跳樓前寫遺書，佢話：「我原諒咗佢，原諒佢嘅年紀、原諒佢未經大腦，如果我又係咁衝動，第二日全部娛樂版都係伍晃榮。」
阿叔𤷪𤺧
雖然伍晃榮口口聲聲話原諒咗阿叔，但對於對方嘅講波態度就唔多認同，尤其係阿叔批評球員射12碼冇助跑嘅話，就唔應該叫12碼，伍晃榮仲舉咗世界足球先生施丹射12碼都冇助跑做例子，佢話：「唔通施丹唔啱，林尚義啱咩？」
對於伍晃榮所講，阿叔噚日喺電話裏面顯得好𤷪𤺧，佢話：「挑！佢退休就退休啦，仲做乜訪問？呢啲是是非非，講嚟做乜啫？唔使講，梗係啲主持喺度撩啦，佢哋（車淑梅）好耐之前都有叫我做訪問，我唔做之嘛！」至於射12碼有冇助跑，阿叔就補鑊話因人而異喎！