薛凱琪（Fiona）與鄭融兩位新生代女歌手前晚於九展演出商台的《拉闊演奏廳》，Fiona件件tubetop露纖腰及微波，鄭融風騷露波點底，各有各睇頭，鬥完性感鬥互數，連緋聞都玩一餐，鄭融更毫不畀面地指Fiona扮純情。
鄭融和薛凱琪前晚演出《拉闊演奏廳》，一開場便以性感服飾勁歌熱舞一番，全場哄動，Fiona件件tubetop，其中以粉紅色及藍色tubetop最貼身，露出微波與纖腰，加上頭頂一個鮮橙色假髮，極度野性。但因粉紅tubetop很鬆身，她要不時抽住，後來惟有貼上黑膠紙。鄭融也不輸蝕，以吊帶奶罩上衣登場，不停搔首弄姿，她演出時又不慎露出粉紅波點底，場館氣溫暴升。
鍾情瘦男孩
鬥完性感鬥互數，Fiona對鄭融說：「聽人講你份人寸寸哋。」鄭融即謂：「我初頭識你覺得你扮純情。」台下觀眾聞言大拍手掌，Fiona不甘示弱又笑說：「我開頭覺得你好寸，唔友善，冇禮貌，懶sexy……原來全部係假嘅。」
後來Fiona再來一招玩緋聞，她介紹緋聞男友方大同出場時對鄭融說：「新聞寫你鍾意同男仔約會，例如有……不過同男仔好過同女仔傳。」鄭融說：「我情願同男仔傳。」
曾被傳斷背的Fiona謂：「我寧願同男仔，但啲人話我同女仔，我鍾意啲瘦瘦哋嘅男仔。」此時方大同彈着鋼琴出場，Fiona推鄭融坐在方大同身邊，鄭融還整個人靠在男方的身上，方大同忍不住笑說：「好舒服呀。」
傳斷背改名
鄭融事後接受訪問謂：「我哋係想個騷有啲feel同熱情啲。」問到似乎不及Fiona性感？她則說：「冇所謂，我哋事先有夾點着。」Fiona則說：「互數係度出嚟嘅搞笑位，希望用好笑方式，等大家知道我哋有幾friend，咁講都唔會嬲。」
至於怕傳斷背緋聞，Fiona說：「搞吓笑，大家唔好咁執着，我諗咗好耐唔知點介紹方大同出嚟，我好豁達，傳男定女都唔介意。」
原來Fiona新歌《小峽谷之1234》本來叫「斷背山之1234」，因當時傳出其斷背緋聞，遂避而改名，誰知改名後又傳她看中醫豐胸，她說：「小峽谷好過斷背，或者第時成為潮流，個個都整細胸。」
採訪：駱華.齡
攝影：仇志德
