比起《一千零一夜》中的《阿拉丁神燈》，「101金句燈神」黃興桂的故事，也是經典傳奇。一句「蔗渣嘅價錢，踢出燒鵝嘅味道」，打破傳統講波格局，令不看球賽的人也拜讀他網上流傳的爆笑金句。只是這位令人笑破肚皮的講波佬背後，原來傷痕纍纍──父親是當年「三狼奇案」被綁匪撕票的富商黃應求；妻子空難慘死……不想悲劇左右人生，決意扭轉，黃興桂的人生態度和金句，一個字去形容，「佩服」！ 撰文：戴彩煥
米高佐敦（MichaelJordan）臨退役前的一場籃球賽事，由黃興桂擔任ESPN體育評述，一句「睇佐敦，有今生，冇來世」，令他一鳴驚人，偶然來句講完等於沒講的「12碼，一係入，一係唔入」（英格蘭球員加歷查告訴我們12碼可以重射），更令觀眾哭笑不得。崇拜他的球迷把這些經典金句放上網歌功頌德，結果十傳百，百傳千。當然，有人為他那些九唔搭八的言論捧腹大笑的同時，也有人認為他廢話連篇而粗口問候。
究竟，黃興桂是想刻意塑造搞笑講波佬形象，還是一切自然流露？
（黃：黃興桂）
黃：自己講嘢唔識搞激（gag），係自然流露，我喺美國成日揸車，電台跟住我（指揸車時經常聽電台節目），聽波聽體育，美國講波佬讀過書，口才好，食晒落我個腦度，有時講波我會用到，好嘅咪成為金句，唔好嘅咪俾人話九唔搭八囉！好似場波已經擺咗落雪櫃度，英文係Thegameintherefrigerator，啲牛油都雪硬，一切已經成大局咁解。
在美國接受教育的他，中文表達能力麻麻，結果，硬生生把英文直譯過來使用，演變成他的獨特講波風格。
黃：我只係一個熱愛足球嘅普通人，係嗰啲聽完之後，唔會又唔彈又唔讚嗰種；我會用教練同球迷嘅角度去睇，會將平時睇戲、睇書同聽歌學到嘅思維帶埋去講波度。好似「蔗渣嘅價錢，踢出燒鵝嘅味道」，係細個時聽阿爺講，啲人窮到用蔗渣纖維做鞋，所以喺我心目中蔗渣係好cheap嘅嘢，而我細個每逢生日都有燒鵝髀食，覺得燒鵝係好好味嘅，先至加埋一齊講，呢句都係我最滿意嘅金句。
將電影、書本、音樂融入足球，雖有創意，但在某些人眼中，卻是廢話連篇，諸如「加利仔有三大缺點，跑得慢、唔夠快，冇速度」，講來講去三幅被？
黃：我係鬼佬手法加重語氣，例如話個女仔唔算太靚，其實即係話佢醜，只不過我唔直接講出嚟啫！只要過到自己嗰關，滿意咪得囉，關公都有對頭人，我係專業評述員，你唔係！我覺得批評講波嘅人，係吃不到的葡萄是酸的；了解、接受、欣賞先至係美德。整多句金句“It'snotmylife,it'snotmywife,youthinkIcare?”（意指別人的看法，他毫不在乎）
對於近日被網友供奉為「燈神」（貼邊隊死邊隊），有何感覺？
黃：啲人一係鍾意我，一係唔鍾意我，自己控制唔到，點挖苦，唔會令我瞓少一覺，唔會唔開心。其實畀貼士係我最唔鍾意，但呢個係潮流，唔容許我唔咁做。
眼前的黃興桂，是個開心快活人，現實卻是悲劇角色。父親黃應求，正是59年轟動全港的「三狼奇案」中被綁匪撕票的富商；結婚四年的太太，於82年空難喪生；數年前，他的胞弟又因癌症逝世。身邊至親，一個又一個的捨他而去。不想永遠做悲劇主角的他，決定扭轉命運。
黃：我要做個心智健全嘅人，唔可以畀悲劇影響我人生，我良師簡而清曾經講：「人生快唔快樂係你自己尋求，你自己爭取，上天唔會畀你。」至於「唔好畀一個藉口自己去墮落」，係喺好多成功運動員同教練身上學返嚟，我希望用自己經歷做個好榜樣，引導聽眾去好嗰邊做人，逆來順受，高興唔好樂極忘形，失意唔好悲觀，有啲嘢控制唔到，擔心都冇用，只有去面對。好似今次公司唔畀我做TVB（世界盃節目），好多人認為失咗個機會，但塞翁失馬，我又有得同何B（何守信）做港台，又唔使介入嗰啲花邊新聞。
感情路上，62歲的黃興桂經常被指女友一大籮，就如利物浦球會會歌一樣”You'llneverwalkalone”（你永遠唔會一個人行路——黃興桂「創意」直譯）。
黃：我年紀咁大，點會有好多女友！我唔係好絕情，以前女友都係紅顏知己，去街食飯嘅好多，但好親密就冇。自己事業上感情上得到嘅經歷，今生無悔，𠵱家太自由啦，如果有fulltime女友，會唔自由，老婆過身，單身咗咁耐，會唔會搵番個伴？順其自然啦！
攝影：葉君海
