說蘇玉華是低調的人，相信沒有人反對，出道12年來鮮有緋聞或是非。她總是默默耕耘，經過多年努力，終於在無綫劇集《奪命真夫》中擔正。公仔箱、話劇界兩邊走，蘇玉華遇到的對手都屬於演技派，談到印象最深刻的男演員，她首選梁家輝，還笑言若世界上有兩個家輝，她一定「𦧲」飯應嫁給他。 撰文：楊潔雯
論盡男對手
蘇玉華出身於演藝學院表演系，受過正統演技訓練，早被認定為演技派，由舞台劇界跳到電視圈，甚至乎電影界，她遇過不少伯樂，令其演藝事業更上一層樓。愛用「有福氣」來形容自己的蘇玉華，自覺比人有更多機會，遇到的對手均非泛泛之輩。
劉松仁神秘
談到合作過的男對手，一向內斂的她也情不自禁高呼「幸運是我」。她第一個就提起梁家輝：「我一開始已經俾佢迷倒，覺得佢好正，我感覺到家輝太太同佢兩個女都好幸福，佢個人好有heart，好熱情，無論對工作、家庭定係生命，嗰份熱血係可以喺佢身上感覺到，好值得人去學習，係我做戲之外學到嘅嘢。佢呢類人好似恐龍咁，絕晒種，所以同佢合作真係好開心，如果呢個世界有第二個梁家輝，我一定𦧲飯應嫁畀佢。」
印象中，劉松仁是近年跟蘇玉華合作最多的拍檔，在她眼中，松哥是一個異常神秘的人，她說：「如果唔熟松哥，會覺得佢好難接近，畀人感覺好cool，但係熟絡咗，就可以分享好多嘢。松哥對朋友好好，佢都話做佢朋友最幸福，因為佢會無條件幫朋友，我哋係朋友，所以佢對我好好。
「松哥教我好多關於演戲方面嘅嘢，好似知道要拍《男人之苦》咁，未收到劇本，佢已經打畀我，同我討論個角色應該點演，佢係個好易投入角色世界嘅人，拍攝現場佢就係大家嘅精神領袖。」
溫兆倫衰格
蘇玉華第一次擔正做女主角的劇集是《奪命真夫》，夥拍林保怡和溫兆倫，她覺得很有挑戰性：「個劇本寫到每個角色都好有發揮，好懸疑，大家都會追住睇，保怡畀我印象好好，雖然唔係好熟，但唔知點解好有默契，可以話係一拍即合，好夾，大家都好信任對方，唔會怕對方搶戲。至於溫兆倫，佢其實幾好人，對我幾好，不過佢做啲衰格賤佬，真係好似、好入戲，你見到真係想打佢。」
至於時下新人，蘇玉華對他們有以下忠告：「其實演藝界係冇方程式嘅，呢個世界又有幾多個馮寶寶？演戲係要靠磨練，同新人合作，有時佢哋唔知自己做乜，又講唔到，又聽唔到，做戲最重要係聽同講，要留心聽對手點講，先可以投入。講，除咗懶音，仲要知道點樣講，先可以表達到你想表達嘅情感，講得唔好就講唔到個意思同感覺，所以係要花工夫，唔可以淨係帶住個軀殼。」
吳卓羲OK
《男人之苦》有兩個偶像新人，蘇玉華說：「吳卓羲都唔算新人，我覺得個角色好啱佢做，做得比我想像中好，我未見過吳卓羲做喜劇，覺得OK。Toby（梁靖琪）就真係新人，佢好有禮貌同埋好肯問，呢個係新人應有嘅態度，總好過遲大到，又以為自己好叻，Toby第一次做戲，都算交到貨。」
攝影：陳慧安
髮型：DickyLamofhairConcept@W1
化妝：VINCITsang.com
服裝提供：BELLA
