立法會班議員平時開會咁忙，𠵱家趁住議會唞暑期間，唔知佢哋有咩嘢做？難得放假，梗係要去relax吓啦！嗱，香港咩都有，動嘅就有大型樂園，又有濕地公園，靜嘅就有冰燈展，不過班議員似乎對本地嘅玩意冇興趣，個個都志在四方，寧願花錢去外遊好過，家陣交通咁發達，日本呀、台灣呀，內地呀，都畀班議員玩過晒，今年佢哋要挑戰難度，民協馮檢基話趁住青藏鐵路熱潮，會遠征西藏，八方驚佢承受唔到唐古拉山呢啲成海拔五千米嘅高度喎。至於民主黨馬丁，佢個仔啱啱喺英國讀完法律學士返咗香港，九月就升讀港大PCLL（法律證書），不過阿仔返嚟，馬丁就去冰島旅行，一定係香港太熱喇，所以要去冰島做吓漁夫避世，不過阿仔以學業為重就唔同佢去，仔大仔世界都係咁啦。唔知蔡蔡子係咪仲怕熱，佢竟然同八方講打算同朋友去北極，不過八月立會要開竊聽會議的話，佢就會改去西藏。如果八方遲吓去西藏，話唔定會撞到好多議員！