「軟硬天師我支持你，三個fans一齊嚟……fans係我哋嘅食糧，買我隻碟又買我幅相。」今次來了不止三個fans，而是四個，四個忠心耿耿的軟硬fans，雖然看慣偶像又寸又冷的黑面，但只要對方露齒一笑，已即時冧到暈，多年來更搜括了不少有關軟硬的珍藏品，件件都是心頭肉。本月軟硬天師舉行的演唱會，對她們來說是一大盛事，因為豆豆、CarCar、Zelda及Christina追隨軟硬十多年，林海峰所指的軟硬fans招魂活動，又怎能少了她們？ 撰文：李珮洳 攝影：仇志德
愛阿Jan多過老公
豆豆：「我13歲開始鍾意阿Jan，因為佢靚仔、有內涵同埋夠專一，嗰時放學我日日都上商台等佢，有一次佢喺張相上面寫住『唔好上嚟咁多呀，知冇！』，我當然唔理佢啦。跟住我又日日打電話去佢嗰個節目，有一次阿Jan搶咗個電話鬧我，叫我唔好再打嚟。」
偶像一笑即冧
已為人婦的豆豆甚至會拿偶像與丈夫比較，她認真地說：「有時見到阿Jan黑面又冇嘢同我講，或者sende-mail畀佢幾日唔覆，我個心就會好嬲佢，跟住我就會安慰自己，呢個世界都係老公對我最好。不過阿Jan對我笑嘅時候，我又會覺得佢係最好，我老公都知我好愛阿Jan，佢從來都冇呷醋。但係我好想講，今次推出嘅T恤細、中碼好快就賣晒，件大碼又大到成張枱咁。」
在眾多收藏品中，豆豆最愛其中一張近期與阿Jan的合照，相中二人均流露燦爛笑容，她笑說：「我跟咗佢咁多年，好少見到佢笑㗎，唔好講係開口笑嗰隻啦，露齒笑真係少到不得了，但係呢張相阿Jan笑到露齒，真係難得。」
逃學送機淚漣漣
CarCar：與豆豆是中學同學的CarCar，對於偶像多年來被指「寸」十分不平，她說：「我都唔明啲人成日話阿Jan好cool好寸，其實佢份人好細心，間唔中會做啲sweetsweet嘢。有一次冬天我哋喺門口等佢，佢見我哋凍到縮吓縮吓，嗰時我哋好鍾意叫佢兩個喺我哋隻手畫公仔，嗰日阿Jan就喺我手背畫咗一個太陽。」
當時身為學生的CarCar更不惜逃學到機場送偶像機，她笑說：「嗰時知道阿Jan要去日本幾日，我哋就喊起上嚟，因為有幾日見唔到佢，到佢走嗰日，我同豆豆就逃學去機場送機，去到見佢走當然又喊啦。」
鍾意軟硬好威
Christina：「我94年先開始鍾意軟硬天師，我覺得佢兩個好叻，同其他歌手好唔同，當時好多人都係鍾意四大天王，我就要同人唔同，我反而覺得自己鍾意軟硬好威。我就連上readinglesson都係睇《天空小說》，連做讀書報告都係做《天空小說》。」
老翻碟當係寶
Zelda：「咁多年嚟我都買咗唔少軟硬嘅嘢，相啦、唱片、卡式帶、黑膠碟同小說統統都有，所有嘢都會畀佢哋簽名，惟獨係有一隻老翻碟我唔敢畀佢哋簽。嗰時有人出你隻老翻碟即係代表你紅，有一日我經過地鐵站口，見到有軟硬翻版碟，入面有佢哋嘅歌之餘仲有兩隻日文歌。另外軟硬出咗咁多本書我都好鍾意，每次睇都忍唔住笑，同埋《天空小說》嘅boxset都係我最愛珍藏之一，當然我最愛嘅係《車欠石更》嘅卡式帶、黑膠同CD。」
