鄭嘉穎雖然住喺西貢，但佢經常性喺中環出沒，唔知係咪貪近住列堤頓道嘅緋聞女友周麗淇西半山屋企，抑或真係難抵中環美食吸引，所以特別鍾情夜蒲中環。
早幾日夜晚十一點零，關仁又喺中環見到鄭嘉穎同一位戴眼鏡嘅斯文女伴及兩位男性友人，幫襯擺花街嘅翠華茶餐廳消夜，一行四人坐喺茶餐廳二樓嘅卡位，戴cap帽嘅鄭嘉穎同四眼妹打對面坐撐枱腳，雞琢唔斷極好傾，佢仲邊食麵邊同對方講笑，𠱁到四眼妹鬼咁開心，笑到把口都合唔埋。
冇晒笑容
半個鐘後，鄭嘉穎同友人開餐完畢，由佢做老細請客，埋單大概百零蚊，相當經濟實惠，之後離開茶餐廳都同四眼妹有講有笑，點知行到路邊攞番佢架MiniCopper車仔時，發現因為違規泊車被警員請食牛肉乾，罰款320大元，鄭嘉穎即時黑面，兼且唔多忿氣，特登行前昅吓泊喺附近嘅車輛有冇被抄牌。
其實其他車有冇收告票，鄭小生都係要畀罰款㗎啦，只係諗唔到「交通費」會貴過餐消夜，難怪佢上車時冇晒笑容，塊面仲黑過鑊底。
關仁
