身在內地拍攝劇集《楚留香傳奇》嘅朱孝天，日前經歷喪父之痛後，呢幾日心情本應已平復，點知噚日忽然傳出佢大發脾氣，令《楚》劇導演鞠覺亮頂唔順，劈炮辭職，仲返咗香港。噚日鞠覺亮被問到請辭原因，佢就話自己只係請假而已。再問到佢今次「請假」究竟係咪同朱孝天有關，佢就話劇中另一演員王傳一喺溝通上比朱孝天成熟好多，似乎有所暗示，不過朱孝天嘅經理人就話佢同導演溝通上完全冇問題。