「做人如果冇夢想，同條鹹魚有乜嘢分別呀？」周星馳在電影《少林足球》中，曾經說過這句經典對白，這正正是無綫武打綠葉王郭政鴻的心底話。數年前，郭政鴻憑《西遊記—貳》飾演通臂猿猴成功出位，之後竟霉到向陶大宇度水度日、借酒澆愁。雖然嘗盡人生起落，但時至今日，他仍不放棄娛圈夢工場，只因心中一團火從未熄滅。 撰文：朱倬誼
郭政鴻當年入行做武師，高峯期月薪四萬，揸跑車用水壺大哥大，八面威風。參選新秀落敗後因緣際會下投身電視藝員行列，頭十年捱生捱死卻無名無利，能頂到今日，全因一段「大宇奇緣」及對演藝事業的熱誠。
「連三線都企唔到」
鴻仔道出他人生中最難過的日子，實在有賴陶大宇送上的心靈雞湯支持才捱得過，他說：「01年，我喺《智勇新警界》入面做個小角色，係喺我最唔開心嘅時候拍嘅，做到一塌糊塗，嗰陣我好冇方向，對好多嘢憂心，前途唔知點，公司唔續約冇飯開，個人冇狀態，冇信心。喺播完《西遊記—貳》、《南龍北鳳》之後，到頭來唔好話二線，我連三線都企唔到，好悲觀，晚晚飲酒，好頹廢，做嘢每況愈下。
「我喺99年開始下滑，工作量少、出鏡少，角色質量唔好，邊有心機做吖？諗住轉行又唔知做乜。陶大宇係我呢個圈最好嘅朋友，佢最紅嗰陣拍緊《縱橫四海》，就係我最霉嘅時候，佢喺生活上、心靈上、金錢上都幫我好多，佢對我點，我係永遠唔會忘記。嗰時我媽咪腸炎開刀，大宇特登買燕窩車去我屋企，我好感動，佢曾經借過錢畀我，數目唔太多，嗰時開支大，自己搬出嚟住，點知工作量減少，出面市道又唔好，冇前景又出去玩，使下使下就使凸晒。」
真正紅褲仔出身
人到絕境時，一天鴻仔忽然開竅，他說：「係人大咗，開朗咗，知道食緊呢口飯，仲未死得，諗下自己長處、短處喺邊，我長處係動作，監製知我做動作得，替身都慳番，所以之後就拍好多打嘅劇集。我𠵱家開心嘅，以前啲人只係覺得打呀，畀郭政鴻做啦！今時今日，拍嘅係戲多過動作，呢段時間幾漫長，用咗好多心思，但公司唔多我呢類人，我真正係紅褲仔出身，呢樣係我優勢，但唔係有陶大宇，我已經瓜咗、玩完。」
雖然曾經衰到貼地，但鴻仔對上位做一線藝員依然永不放棄，他笑說：「任何演員都寄望有呢一日，喺呢行一日唔走，一日都可以繼續玩呢個遊戲，係馬拉松，係每個演員嘅夢想，唔係入嚟做乜呀？觀眾有好多唔同層面，成熟都可以有一班觀眾，一線寄望一定有，希望還自己一個願望，至少年紀大嗰陣都唔會遺憾。」
