行政會議班大佬又到咗一年一度「晒冷」嘅時候，行會秘書處噚日公布佢哋最新申報利益資料，行會中人大部份非富則貴，唔少人揸幾十「叠」樓，最富貴係賓架李國寶，東亞李家貴為本港政經界第一望族，佢身家自然份量十足，申報持有83個本地同海外物業，仲有八個位於香港南區嘅車位，蟬聯行會「樓王」。但同舊年比較，寶哥哥減持咗八個本地物業，海外就添多一個。至於佢細佬教統局局長李國章申報物業數量無變，做官嘅可能無咁貼市，唔敢隨便買賣。
外家背景雄厚嘅黃仁龍，做咗律政司司長後唔再係執業大律師，今年無再申報係大律師公會成員，同人合股持有大律師辦公室嘅公司亦已賣盤，𠵱家只有三個喺南區物業。另一官員俞宗怡就新申報係上海總會會員同公益金高級顧問。
陳智思成「董事王」
其他官員申報資料變化唔大，入主禮賓府嘅煲呔曾依然只有兩個分別喺香港同英國嘅物業，照計佢仲可以住多五年禮賓府，應該唔使急於入市搵地方退休歎世界。
其他非官守行會成員各有路數搵食，民建聯曾鈺成獲愛國商人胡法光賞識，成為菱電中國受薪顧問，「鐵娘子」史美倫則係瑞典上市公司InvestorAB高級顧問，呢間公司係國際性企業，業務包括保健、科技、工程以至金融服務。
啱啱獲頒發金紫荊嘅陳智思，繼續係行會「董事王」，舊年身兼38間公司董事，今年再多三間，總共擔任41間公司董事。陳智思生意愈做愈大，難怪佢一直放風話無意連任立法會，都係搵錢至上。
經常被工人投訴嘅「電池王」金山工業老闆羅仲榮，舊年申報係七間公司受薪董事同持有五間公司股份，今年各減一間。而元老級人物李業廣繼續唔沾手香港房地產作風，申報表內嘅本地物業通通由妻子持有，佢只喺海外投資。即將卸任嘅馬會主席夏佳理，今年4月做咗港交所主席，最新申報已有齊資料。