前E-Kids成員阮民安（Tommy）近年屢次闖禍，繼醉酒駕駛後，昨日又被爆在澳門賭錢，欠下貴利後遭大漢挾着回港籌錢還債，昨日他透過經理人表示會改過自新。肥媽對此毫不留情大罵：「佢係咪儍㗎。」
前E-Kids成員阮民安近年轉投林小明的寰宇電影公司經理人部門作獨立發展，並準備推出個人唱片，日前他被踢爆於周三到澳門賭錢輸清光，被指向大耳窿借錢，連息要還24萬，還簽下借據。大前晚他遭兩名大漢押返港籌錢還債，Tommy情急下致電林小明求救，經調解後，欠款減至12萬。
Tommy經理人阿標昨日否認部份傳聞，他在電話中說：「嗰日Tommy去澳門探朋友，之後去咗賭場諗住博吓，其間有人借錢畀佢，喺引誘下輸咗五、六萬蚊。發生呢件事後佢都知錯，仲答應以後唔賭錢，佢好後悔，希望大家可以原諒。」
「教壞歌迷」
問到債項最終是否由林小明代還，阿標說：「幾萬蚊，佢自己解決到。」阿標表示Tommy日內會到橫店與李彩華和謝霆鋒合作電影《詠春》，另外Tommy本於今日下午到青衣城出席活動，但臨時以拍戲為由缺席。
在東魅時代已認識Tommy的肥媽瑪莉亞得知事件後甚為勞氣，激動地說：「佢以前好勤力，做乜鬼呀佢？係咪Stareast之後冇咗依靠，事業混得唔好呀？佢儍定係黐線呀？掂賭同毒品最冇益，今次當用10幾萬買個大教訓囉」。
周麗淇昨以「滅罪之星」出席活動，她說：「咁係教壞歌迷，希望呢單嘢有家長指引啦。」關心妍昨也說：「沉迷賭博會自毀前途，我都有朋友賭輸錢賣車賣樓，代價好大。」
狀似講數
至於身為Tommy師姐的李彩華說：「我睇完報紙後send咗個message畀佢，如果佢知錯，都應該畀個機會佢。」
Krusty則大爆於大前晚在尖沙嘴見到Tommy與幾個男人站在一起，猶如講數，張詠恩說：「唔知係咪呢單，公眾人物要檢點，歌迷會學㗎。」
曾被爆偷竊
現年26歲的阮民安，曾在Stareast旗下餐廳做侍應，因獲譚詠麟賞識，於02年與歌手郁禮賢和林詠倫（現名林泳）簽約Stareast，組成E-Kids，發展未如理想，最終於去年解散，及後獲寰宇電影老闆林小明羅致。03年時，Tommy被踢爆中五時撬同學儲物櫃，涉嫌偷竊。今年三月，又因醉酒駕駛被罰款和停牌一年。
採訪：比華利、楊潔雯、駱華齡
