曾經先後喺無綫、亞視兩邊走嘅電視藝員林韋辰，向來對家庭生活三緘其口，神秘程度直迫鐵筆撬唔開把口講家事嘅葛民輝，但林韋辰早年已婚，太太係台灣人，結婚超過15年，而且仲有個囡囡㖭。
不過早幾日下晝三點零鐘，打扮causal嘅林韋辰就同一名年約廿零歲嘅北方佳麗出現尖沙嘴EYEBAR眼鏡店，現場見呢位北方佳麗着T恤短褲，皮膚白到反晒光，雖然戴太陽帽同墨鏡，但樣貌激似前亞姐冠軍呂晶晶，講嘢亦帶內地口音。
照鏡採礦
當時林韋辰同女伴喺店內分頭試戴太陽眼鏡，但女伴似乎唔多啱心水，於是行去睇對方試超，林韋辰試超時表情多多喇，一時嗡鼻一時眼眨眨，𠱁到女伴掩嘴大笑，只不過人哋咁有儀態，佢就竟然趁對方唔為意，喺照鏡時「採礦」，真係嚇人。大概過咗大半個鐘，林韋辰同女伴離場時刻意左右彈開，各自雙手插袋，扮到唔多熟咁行去停車場攞車，由男方做柴可夫載女伴離開。
話時話，圈中有傳林韋辰舊年婚姻觸礁，早排就有人見過佢同呂晶晶喺紅磡出現過，到底林生感情狀況如何，怕且只有佢最清楚啦。
