梁伯韜今次買電盈單刁，好多人都話係超人暗中出手，由蕃薯梁出頭。
對於呢個傳聞，蕃薯梁噚日喺接受電台訪問時唔承認亦冇否認，只係話：「喺呢個階段關於嗰啲投資者，我認為唔適當喺呢個時間講，因為我個交易都未進行，我只係簽咗個有條件嘅協議。」
不過，對於同超人嘅關係，蕃薯梁就話，「李嘉誠先生一向都好支持我，都係我一個良師嚟，我成日都向佢學習嘅。」八方都成日睇超人嘅報道，向佢學習，可惜佢唔肯支持吓我吖！
除咗超人做良師，原來蕃薯梁背後仲有人撐佢，就係全能嘅上主。
金融界都知蕃薯梁係虔誠嘅天主教徒，仲成日同人講，冥冥中有個主指引佢路向，講開今次電盈單刁，蕃薯梁話：「我深信個主成日同我喺埋一齊，無論係困難時，或者係面對新挑戰，我知主會同我一齊走過，所以我對前景充滿信心。」你估今次買電盈究竟係上主「指引」佢，定係超人「指引」佢呢，抑或佢哋一齊出手呢？