張敬軒鑽研劈腿
「呢本書吸引我嘅理由都係因為我想知點解男人鍾意一腳踏兩船，根據本書就話其實男女都會劈腿，只係女仔個慾望冇男仔咁強烈。自己一向喜歡睇理論，有關心理行為嘅書，另外就比較欣賞日本作家村上春樹，覺得佢啲作品唔止愛情咁簡單，又有文學成份，仲有少少色情，所以特別受男性歡迎。」
關智斌眼睛旅行
「呢本係遊記，講一個記者冇做之後買咗張機票環遊世界，去過好多唔同嘅地方，好似柬埔寨、南非、土耳其，呢啲地方我都好想去。本身我都好想做背囊友，孭住個袋周圍去，但係𠵱家咁忙，實在係冇呢個機會，所以睇住呢本書望梅止渴囉！同埋吸收定啲資料，到時我真係可以咁樣去遊行，好有用㗎。」
張致恒科學尋根
「呢本書我𠵱家睇咗一半咋，因為佢入面講嘅嘢太深喇！要由頭睇過，呢本書係講科學同教會，又講吓分子、反物質，好多科學上面嘅嘢，睇完都未必明，所以愈睇愈亂。但係佢講嘅情節好容易帶你入去個場景，令你睇得好投入，我覺得好睇過《達文西密碼》。可能市面上唔係好多講宗教同科學嘅書，所以我覺得好吸引。」
麥子豪刺激思考
「平時我都鍾意睇吓書刺激思考，哲學就係要人識得反省，我每日做完嘢返到屋企，就會諗吓今日我做嘅嘢，有邊啲好，邊啲做錯，咁錯咪改善吓囉！好似我會諗今日練舞我有乜唔好呢？有冇地方要改善，點跳先會好睇呢？如果你用多啲個腦，訓練佢靈活啲，咁做嘢都好似會易啲。」
採訪、攝影：王連連
