樂壇大孖一出道就撈得好掂，一心諗住拉埋細孖入行，點知細孖唱極都冇人氣，啲碟又唔賣得，搞到唱片同經理人公司好頭痕。關仁八到佢哋有條絕橋，好多時係買大送細，不過有時廣告商指定要大唔要細，佢哋就會先答應咗，然後採取拖字訣，等到時間逼近時，就回覆話大孖冇期嘅同時，又狂sell細孖。廣告商唔可以喺短時間內另覓人選，咪惟有乖乖就範囉！
正氣大叔陪馬唞暑
世界盃踢完，阿嬸卸甲歸田，日日同街坊打牙骱過日辰。不過，跟阿嬸一樣退咗休嘅正氣大叔一定仲失落，原因唔係世界盃賽事結束，冇得再寫日記，而係馬季唞暑，冇得賭馬仔呀！原來正氣大叔一向好爛賭，每逢賽馬日一定喺馬場撞見佢，閒閒哋落注一萬幾千，都咪話唔狼！關仁聽講佢未退休前，成日利用自己工作身份出入馬場，唔使喺公眾席同班馬迷迫，家陣退咗休，出入馬場梗係冇以前咁方便啦！