漢登（448）將喺嚟緊星期四（20號）公布全年度業績，業績期前後，有調整，就撈底。漢登06年度中期（9月止）純利急跌50%到320萬（美元．下同），估計即將公布嘅06年全年度業績，唔慌靚仔。但要咁睇，漢登喺中期內，因為新開展嘅美國業務未如理想，連埋集團將地區業務一次過狠撥，拖累純利插水。若果撇除美國地區業務，呢隻大腳八嘅總經營溢利升幅達到25%到1080萬銀，業績並唔係差。漢登07年度純利回穩，去番05年度1600萬銀水位，PE都係得5倍幾水位。
再講，漢登今年頭獲惠理基金睇中，入股漢登9%，成本價講緊1.06港元，漢登現價不過0.76元，平過基金入市價。漢登現價彈番上1.06元，股價潛在升幅接近40%，到時，07年度預期PE不過8倍水位，短期再有震盪，有調整，值博率更高。
麗國有基金揸重貨
麗國（191）最近呢個月喺0.5元至0.6元之間打底，個市橫風橫雨，暫時突破無望，就喺呢段水位炒吓上落。麗國最新NAV1.84元，現價（0.57元）相對折讓近70%，有NAV墊底。再講，麗國今年首獲基金PMA昅中，PMA喺3月以嚟，整體上都係增持，家陣揸住麗國12%，似乎煲得好重。而PMA增持期間，入市成本價，肯定貴過麗國現價。麗國再跌，到0.5元撈底，上番0.6元，潛在回報20%，有魚有肉。
錢雋