周慧敏解碼上癮
「我睇呢本書都係因為俾作者另一本書《達文西密碼》所吸引,雖然仲未睇完,但係覺得佢仲好睇過《達》,所以都要推介吓。自己特別鍾意睇一啲有關動物嘅書,好似動物心理學,或者一啲真實嘅動物故事,曾經睇過一本書《十隻貓的山居歲月》,佢係中英對照,內容令我好感動,我仲特別鍾意去一間書店買書,因為嗰間書店嘅老闆娘好有愛心,收養咗唔少流浪貓。」
董敏莉不求完美
「平日我鍾意睇一啲啟發心靈嘅書,而且無論英文定中文我都會睇,好似《IfIWereYou》呢本書,用嘅英文唔算深,所以唔使英文好叻都睇得明,而呢本書就係講一對好朋友,一個靚一個唔靚,兩人嘅際遇亦都好唔同,佢哋分別羨慕對方嘅生活,最後兩位主角嘅生活仲嚟個大轉變,我覺得本書好特別,可以帶出每個人都唔會係完美,所以做人就要開開心心,唔好祈求一啲得唔到嘅嘢。」
李彩華血腥震撼
「呢本書係柴智屏介紹我睇嘅,柴姐話佢睇完呢本書發噩夢,因為作者描寫一啲血腥場面好真實。《樓下的房客》係講一個業主將一棟五層大廈放租畀唔同嘅人,啲租客包括一對男同性戀者、OL、一個淫蕩少女,但係個業主喺所有房放咗針孔攝錄機偷睇,之後就做好多嘢,令啲住客互相殘殺。我覺得呢本書最好睇就係夠恐怖,好少書可以寫一啲暴力血腥場面寫得咁震撼。」
周麗淇至理名言
「呢本書係我幾個月前買嘅,係屬於比較勵志嘅書,書裏面字眼雖然唔係好有深度,而且係一啲好簡單語句,但有100句中國古代嘅至理名言,等讀者可以理解吓人生小道理,最好附有註解,容易令人明白,大人細路都啱睇,其實我都好鼓勵寫作,因為現時好多人都會打字同SMS,忽略咗寫嘢,我都推出咗一本《thechild-woman手冊》紀錄咗自己感受,讀者睇完可以寫意見畀我睇㗎。」
採訪、攝影:李珮洳、駱華齡