森美與小儀上月於商台《架勢堂》舉辦「我最想非禮嘅香港女藝人」網上選舉搞到滿城風雨，落得被雪藏收場，至今坐冷板櫈一個月，已有大肚6個月的老婆和囝囝的森美連隨閂水喉，日前帶妻兒慳家坐小巴外出，但遇見記者時，竟然拋妻棄子，飛奔落車避鋒頭，狠心丟下妻兒流離浪蕩。
商台節目《架勢堂》上月舉辦「我最想非禮嘅香港女藝人」舉選玩出火，結果搞到節目執笠，主持森美小儀被罰停薪留職兩個月，森美更加接連失中大教職、被廣告商飛起，連主持無綫遊戲節目《15/16》的飯碗也丟掉，損失十分慘重。
向來食好住好的森美事業全面失陷，偏偏撞正購入市值逾千萬元的廣播道嘉皇臺豪宅未及一年，老婆Veronica又懷孕6個月，更須為就讀幼兒園的囝囝供書教學，估計每月開支約十萬，停工兩個月對仔細老婆嫩的森美而言確大受影響，故近日森美多數自閉家中，實行慳家兼避鋒頭。日前他一家三口逛九龍塘又一城商場，也棄用寶馬靚車，節省油錢及停車場泊車費，寧可選擇搭小巴，兩大一小車資僅需七元，認真經濟。
爸爸出走囝囝茫然
本月7日下午2時多，森美與囝囝同穿T恤襯板仔褲的父子裝，其妻則與森美齊齊戴帽及作黑白配打扮，森美手拖愛兒由寓所步出街頭等車時，已四處張望視察環境，其後舉家登上往九龍塘地鐵站的專線小巴，坐在車上不停回頭望的森美發現有採訪車尾隨，竟然狠心拋妻棄子，在九龍塘火車站衝落車，一支箭直奔又一城方向，森美嫂慘被老公撇甩，只好坐小巴到終站，再拖小森美往九龍塘地鐵站。
粗身大細的森美嫂在車站內拖實囝囝，邊講電話邊漫無目的踱步，逗留約十分鐘後才步往又一城商場，但兩母子又駐足𨋢門前，森美嫂只掛住狂煲電話粥，小森美就全程茫然，表現沉靜，與父親的強烈求知慾簡直成大對比。
森美嫂講足十分鐘電話後，再拖囝囝搭行人電梯上樓，擠進人潮中失去蹤影，相信這招趁亂撇，也是得自老公真傳，只不過森美為避上鏡而丟低婦孺確令人費解，大多藝人都是保護家人第一，千方百計避免親友見報，未知是否因森美認為自己屬偶像派藝人，抑或不欲慳家過程曝光，故才反傳統防己上鏡。
停職照返商台開會
被揭慳家行動後，仍被停薪留職的森美於本月10日即轉軚出動寶馬，由妻子接載到商台逗留一個鐘，臨走時，他見有記者在場即故作從容說：「嘩！咁多人？乜事呀？我返嚟開會咋。」之後便邊講電話邊徒步離場，這時同樣正在講電話的森美嫂駕車經過丈夫身旁，發現有記者竟未有停車，踩油直驅寓所。
採訪、攝影：娛樂突發組
