今個狗年雙春兼閏月，娛樂圈喜事頻傳，昨日譚耀文公布首次榮升老竇的喜訊，表示早前在北京造人成功，太太Fiona現已懷孕約四個月，預產期為12月24日平安夜，正好是其結婚紀念日。為照顧大肚嬌妻，阿譚特斥資33萬元購下豐田Previa七人車代步，大前日更出動新車載妻子到筲箕灣撐枱腳，大啖魚蛋粉。
現年37歲的譚耀文與太太Fiona於大前年的平安夜在美國舉行浪漫白色婚禮，沒想到三年後的同一天，竟是他首次榮升老竇的大日子，為狗年喜事頻傳的娛樂圈再添喜訊。阿譚與Fiona婚後十分恩愛，因阿譚不時要返內地開工，Fiona為爭取見面時間，寧願退股美容院，實行做跟得夫人黐實老公。早前阿譚在北京拍攝劇集《雪山飛狐》時，Fiona為了製造驚喜，特別選在3月19日他37歲生日當天北上探班，令阿譚極之開心，結果二人「一擊即中」，成功造人。
心情興奮
笑咪咪歎魚蛋粉
現時Fiona已懷孕約四個月，體貼的阿譚為方便大肚嬌妻出入，近日斥資約33萬元購買白色豐田七人車代步，至今落地不足一星期。大前日阿譚便出動新車，載老婆到筲箕灣東大街安利魚蛋粉麵店開餐，二人與同行友人大啖該店馳名魚蛋粉，心情大好的阿譚全程笑咪咪，邊食邊聊天，歎足40分鐘才離開。
現場所見，Fiona即使穿上鬆身衫裙也難掩微隆腹部，臉頰和手腳略見浮腫，步行時更刻意以手袋遮肚。尾隨的阿譚埋單後，發現記者即友善地打招呼，之後便偕妻子登上新車離去。
記者昨日致電阿譚恭喜他榮升父親時，他難掩喜悅心情，高興地說：「好興奮呀，我哋都好鍾意細路仔，佢係madeinChina㗎，喺我今年3月生日時，太太上嚟北京探我班時made嘅，好巧合，預產期係平安夜。」
重咗10磅
「佢容易攰有啲𤷪」
阿譚又說：「其實我哋都有計劃，係時候去諗生BB，我同太太嘅骨骼同DNA非常優良，所以一plan就有，我太太屋企人喺加拿大，暫時都未定喺香港生定喺加拿大生。」
他又表示約兩個星期後便能知道BB性別，但他覺得生仔生女都沒所謂，又笑說：「太太重咗10磅左右，佢開始容易攰，有啲𤷪𤺧，唔可以行太耐，所以特登買咗架七人車畀佢。」
採訪、攝影：娛樂突發組
