海域集團（1220）同埋海域化工（2882）賬目事件搞咗幾日都未掂，而且愈搞愈大，股價亦跌足幾日。
經紀黃話，兩隻股都係基金愛股，家陣情況未明好不妙，而投資者最關心，就係長期捧場嘅金手指會唔會沽貨走人。
海域昨日跌20.47％，收1.01元。至於海域化工跌得仲勁，高達28.74％，收0.62元，兩股分佔港股20大跌幅頭兩位。
另外，昨日大市雖然回落，但公布以7.6億元收購印尼油田的中信資源（1205）股價就企硬。經紀黃話，據芬佬所講，中信資源呢單交易只係初試牛刀，稍後陸續有油田收購行動，據講目標仲遠到哈薩克斯坦咁遠。
中信資源昨日升3.68％，收1.41元，成交股數1730.8萬股，金額2405萬元。
講到油田呢門生意，小初唔識唔敢亂講嘢，但傳聞收購size唔細，要講掂數應該唔容易，最好睇定啲先至決定落唔落注。
慕容小初