周慧敏（Vivian）和男友倪震前晚拍拖看電影《子狐物語》首映，二人不時打情罵俏，倪震大玩踢爆，指女友看電影看到感動場面時會喊至扯蝦失控，所以不會經常外出看戲，又或要為她預備紙巾，瘀事曝光，Vivian惟有以笑遮醜。
周慧敏和男友倪震、陳奕迅（Eason）、童星原島大地、莫凱謙、鄧梓峰及子女，以及蘇志威、劉小慧一家三口等，前晚在灣仔會展欣賞電影《子狐物語》首映，為NPV非牟利獸醫機構籌款。Vivian穿上白色tubedress裙，與男友的白恤衫以情侶裝亮相，成為全場焦點。
自認眼淚澎湃
倪震前晚接受訪問時大爆女友為人眼淺易喊，所以特別帶定紙巾陪她看首映，他說時還從口袋掏出一叠紙巾，並說：「佢喊得好犀利，有時睇戲未入主題就喊。」Vivian又說：「我喊起嚟好澎湃，一喊就收唔到聲。」
倪震表示好多時為免女友哭至失控，寧願選擇買影碟回家觀看。她說：「上次喺加拿大睇《人工智能》（ArtificialIntelligence），我睇咗半場要停，喊足半個鐘，扯完蝦再睇埋落去。」
倪震再爆Vivian看湯漢斯（TomHanks）的《劫後重生》（CastAway）一幕講述排球沖了出海的戲份都喊得一餐時，她顯得很尷尬，倪震說：「我嗰時唔敢笑，真係估唔到佢會喊。」Vivian表示會為電影感動場面而哭，但遇上不開心的事反而會堅強面對。
問Vivian有沒有被男友弄喊？她說：「佢好少整喊我，佢做嘅嘢會令我感動到笑。」
想帶囡囡看戲
倪震曾試過在家中匿埋嚇女友，但又怕嚇倒她，他說：「我試過萬聖節戴咗面具返屋企，又擔心會嚇親佢，結果打電話返屋企通知佢一聲。」
此外，Eason本有意帶囡囡來看首映，但又怕太多人，故打消念頭，他說：「囡囡好鍾意聞歌起舞，佢聽我隻《聽聽》好興奮。」
採訪：駱華齡
攝影：陳慧安
