今屆世盃有好多場面令人印象深刻，好似施丹頭頂馬特拉斯被逐，同埋朗尼踩人「細佬」事件咁，真係值得球迷再三回味。咁啱呢兩單嘢都係由同一位球證發紅牌趕佢哋出場，佢就係阿根廷籍嘅伊利桑杜。老實講，今屆佢確係吹得唔錯，不過可能佢搞出「懷疑睇帶俾紅牌」事件，所以呢位42歲嘅球證喺世盃後嗱嗱聲宣布「掛哨」。
伊利桑杜喺今屆世盃嘅風頭直情蓋過好多球星，佢創紀錄咁包辦吹晒揭幕戰同決賽兩場波，作為球證都算係代表作囉。回顧佢今屆喺世界盃執法都唔錯，仲有咁多體力跑足幾場波都算犀利，可惜佢最後1場執法賽事意大利對法國嘅世界盃決賽，搞到滿城風雨，仲俾人懷疑佢冇問清楚第四旁證係親眼見到施丹頭頂馬特拉斯，定係睇錄影帶見到，就罰咗施丹出場，𠵱家咁多手尾跟。
堅持罰施丹出場正確
雖然伊利桑杜堅持話知道施丹頭頂對手後，從來冇猶豫過要將呢名法國中場驅逐出場，但所謂見好就收，佢仲唔嗱嗱臨借勢退休避一避咩，呢招又的確係高呀！
不過，話時話，國際球證嘅退休年齡係45歲，而伊利桑杜吹埋今屆世盃之後，已經再冇國際大賽可以「挑戰」到佢嘅執法水平，趁住𠵱家喺高峯期「掛哨」，急流勇退，都可以話確係一個最明智嘅決定，我求驗客都支持佢嘅做法。
求驗客話
好多球星都選擇喺高峯期掛靴，今次伊利桑杜吹埋世盃決賽至「掛哨」，揀啱時間，呢啲咪叫做「見好就收」囉。