有「債券先生」之稱嘅李永權，上個禮拜五終於都同做咗9年嘅按揭證券公司講拜拜，但佢話自己唔係退休，只係放個長假，八方就聽聞佢會自己搞生意，詳情係點就冇人知啦。
無工一身輕，李永權在暑假，終於可以同屋企人玩番夠本。佢話會同家人返大陸，亦都計劃緊去吓夢寐以求嘅青藏鐵路，事關佢不嬲都好鍾意研究西域，不過因為個行程都有啲難度，所以淨係打算帶個大仔同行，睇怕大家都有一排好難喺香港見到佢喇！
唔好以為李永權唔使返工，就可以好悠閒咁歎世界，佢話自己分分鐘仲忙過以前，事關佢係香港棒球總會嘅創會成員兼副主席，仲要係好熱心會務嗰種人，好似8月1日，佢就以團長身份，帶領香港女子棒球隊去台北打比賽，聽日會搞個授旗禮（16/7），仲搵埋陳智思同范徐麗泰主禮。
咪睇李永權咁忙，以為佢唔顧家，實則佢不知幾關心三個仔，就講佢創立棒球總會，都係因為個大仔咋！李永權話，個大仔10歲時，想安排對方參加啲課外活動，但又覺得網球孤獨咗啲，足球就一味頭耷耷咁踢，籃球個架又高得滯，諗咗一輪，先決定揀棒球，之後再搞埋個會，你話係咪廿四孝老竇呢！