由青年企業家發展局推動嘅商校伙伴計劃，舉辦至今共有46間公司及學校參加，受益學生超過一千人，其中有個環節叫同學生諗吓想做咩生意，竟然有來自博愛醫院鄧佩瓊紀念中學嘅同學話，想幫阿sir改簿，唔想阿sir做到咁辛苦；亦有同學想做槍手幫同學做功課賺錢。
嘩，國泰員工個個星期六晨咁早起身做義工，就為咗教育下一代，但竟然有學生諗埋啲咁嘅嘢，係就夠晒天馬行空，但有無諗過咁玩法會浪費咗人哋嘅寶貴時間呢？不過作為老師嘅文國強就話，呢個環節係任佢哋發揮，老師同公司唔會出聲阻止，等同學仔學吓點判斷，八方覺得如此看來，有啲成年人真係好通情達理，至少唔會扼殺年輕人想像同坦白發言嘅空間。