領匯噚日出年報，梗係第一時間睇吓董事分到幾多花紅，截至今年3月底，冇董事攞到花紅，皆因領匯實際上喺舊年9月先正式運作，盤數計到3月底都未夠1年，邊有咁快有花紅分。
其實領匯上市時喺本認購文件已經寫明高層嘅人工，至於年報裏面盤數，只反映領匯舊年11月上市至今年3月嗰4個月，有數得計，蘇慶和年薪500萬元，4個月咪百零二百萬，加埋津貼等，總共收咗190.7萬薪津。
同其他上市公司主席一樣，鄭明訓喺年報裏面都有多謝一班董事、員工嘅合作，但佢就特別多謝前獨立非執行董事梁定邦。
今年3月，梁定邦以私人理由辭任，當時市場有好多揣測，估梁定邦辭職可以騰個位出嚟畀「細路仔」基金TCI入局，結果入局嘅唔係「細路仔」而係律師周永健。
講開TCI大手掃領匯時，好多人都認定佢哋要將領匯拆骨，仲有人計數睇吓TCI夠唔夠票數召開董事會，提出換管理層兼拆骨動議，點知呢場「好戲」到家陣都未上演。領匯基金持有人周年大會下個月23日舉行，唔知嗰日見唔見到「細路仔」出現呢？